തിയേറ്റർ സ്‌ക്രീനിൽ പാലഭിഷേകം നടത്തി; ആഘോഷം അതിരുവിട്ടപ്പോൾ പവൻ കല്യാൺ ആരാധകർ അറസ്റ്റിൽ
ചെന്നൈ: തെന്നിന്ത്യയിൽ കടുത്ത ഫാൻസുള്ള താരമാണ് പവർ സ്റ്റാർ എന്ന് ആരാധകർ വിളിക്കുന്ന പവൻ കല്യാൺ. നടന്റെ 'ബ്രോ' എന്ന പുതിയ സിനിമ വെള്ളിയാഴ്ചയാണ് റിലീസായത്. നാളുകൾക്ക് ശേഷമുള്ള പവർ സ്റ്റാറിന്റെ സിൽവർ സ്‌ക്രീനിലേക്കുള്ള തിരിച്ചുവരവ് ആരാധകർ ഉത്സവമാക്കുകയാണ്. എന്നാൽ, ആഘോഷം അതിരുവിട്ടതോടെ ചില പവൻ കല്യാൺ ഫാൻസ് അഴിക്കുള്ളിലാവുകയും ചെയ്തു.
തെലുങ്ക് സൂപ്പർ താരത്തിന് പാലഭിഷേകം നടത്തിയതിനാണ് ആരാധകർ അറസ്റ്റിലായത്. എന്നാൽ, നടന്റെ ഫ്‌ളക്‌സിനോ, രൂപത്തിനോ അല്ല അവർ അഭിഷേകം നടത്തിയത്. മറിച്ച് തിയേറ്ററിന്റെ സ്‌ക്രീനിൽ പാലഭിഷേകം നടത്തി നാശനഷ്ടമുണ്ടാക്കിയതിനാണ് അറസ്റ്റ്.
സമ്മിശ്ര പ്രതികരണവുമായി പ്രദർശനം തുടരുന്ന സിനിമയുടെ റിലീസ് ദിനത്തിലായിരുന്നു ആരാധകർ തിയേറ്റർ സ്‌ക്രീനിൽ പാലഭിഷേകം നടത്തിയത്. പൊലീസ് ഇവരെ കടുത്ത ഭാഷയിൽ ശാസിക്കുകയും ചെയ്തു.
രണ്ട് ദിവസം കൊണ്ട് 50 കോടിയാണ് ചിത്രം ബോക്‌സ് ഓഫീസിൽ നേടിയിരിക്കുന്നത്. സിനിമയുടെ റിലീസുമായി ബന്ധപ്പെട്ട ആഘോഷങ്ങളുടെ വീഡിയോ സോഷ്യൽ മീഡിയയിൽ വൈറലാണ്.
