ഹൈദരാബാദ്: ഭാഷാഭേദമന്യെ ഇന്ത്യൻ സിനിമാപ്രേമികളിൽ വമ്പൻ പ്രീ റിലീസ് ഹൈപ്പ് സൃഷ്ടിച്ചിരിക്കുന്ന ചിത്രമാണ് പുഷ്പ 2. അതിൽത്തന്നെ ഹിന്ദി പ്രേക്ഷകർക്കിടയിൽ ചിത്രം സൃഷ്ടിച്ചിട്ടുള്ള കാത്തിരിപ്പ് ബോളിവുഡ് ചിത്രങ്ങൾക്കുപോലും സാധിക്കുന്നതിലും അപ്പുറമാണ്. ഇന്ത്യൻ സിനിമാ ലോകം മുഴുവൻ ചിത്രത്തിനായി കാത്തിരിക്കുന്നു. ഇപ്പോഴിതാ സിനിമയുടെ ഒരു അപ്‌ഡേറ്റ് പങ്കുവച്ചിരിക്കുകയാണ് അണിയറക്കാർ.

ചിത്രത്തിലെ രണ്ടാമത്തെ ഗാനത്തിന്റെ റിലീസ് തീയതിയാണ് ഇത്. നായിക രശ്മിക മന്ദാന പ്രത്യക്ഷപ്പെടുന്ന ഒരു വീഡിയോയിലൂടെയാണ് പുഷ്പ 2 ടീം ഇക്കാര്യം അറിയിച്ചിരിക്കുന്നത്. ദി കപ്പിൾ സോംഗ് എന്ന് പേരിട്ടിരിക്കുന്ന ഗാനം മെയ് 29 ന് പുറത്തെത്തും. പുഷ്പയിൽ രശ്മികയുടെ നൃത്തരംഗങ്ങൾ രാജ്യമൊട്ടുക്കും ട്രെൻഡിങ് ആയിരുന്നു. വരാനിരിക്കുന്ന ഗാനത്തിലും രശ്മികയുടെ നൃത്തച്ചുവടുകൾ ഉണ്ട്. പുഷ്പ ദി റൂൾ എന്ന് പേരിട്ടിരിക്കുന്ന രണ്ടാം ഭാഗത്തിന്റെ തിയറ്റർ റിലീസ് ഓഗസ്റ്റ് 15 ന് ആണ്. സുകുമാർ രചനയും സംവിധാനവും നിർവ്വഹിക്കുന്ന ചിത്രം നിർമ്മിക്കുന്നത് നവീൻ യെർനേനിയും വൈ രവിശങ്കറും ചേർന്നാണ്.

ഉത്തരേന്ത്യൻ വിതരണാവകാശത്തിലും ഒടിടി അവകാശത്തിലുമൊക്കെ റെക്കോർഡ് ഡീലുകളാണ് ചിത്രം നടത്തിയതെന്ന് നേരത്തെ റിപ്പോർട്ടുകൾ എത്തിയിരുന്നു. അനിൽ തടാനിയുടെ ഉടമസ്ഥതയിലുള്ള എഎ ഫിലിംസ് 200 കോടി മുടക്കിയാണ് പുഷ്പ 2 ന്റെ ഉത്തരേന്ത്യൻ വിതരണാവകാശം നേടിയത്. നെറ്റ്ഫ്‌ളിക്‌സിനാണ് ചിത്രത്തിന്റെ ഒടിടി അവകാശം.

ഡീൽ അനുസരിച്ച് അടിസ്ഥാന തുക 250 കോടിയാണ്. ചിത്രം തിയറ്ററിൽ നേടുന്ന വിജയമനുസരിച്ച് ഇത് 300 കോടി വരെ ഉയരും. ഇന്ത്യൻ സിനിമയിൽ ഇതുവരെ ഒരു ചിത്രത്തിനും ലഭിക്കാത്ത ഒടിടി റൈറ്റ്‌സ് തുകയാണ് ഇത്. പോസിറ്റീവ് മൗത്ത് പബ്ലിസിറ്റി ലഭിക്കുന്നപക്ഷം കളക്ഷനിൽ ചിത്രം പുതിയ ഉയരങ്ങൾ കീഴടക്കുമെന്ന് ഉറപ്പാണ്.