സന്ദീപേ നിന്റെ കാലുകളുടെ ചിത്രം എനിക്ക് വാട്‌സാപ്പിൽ അയച്ചു തരൂ, ഞാൻ അതൊന്ന് തൊട്ടോട്ടെ; ആനിമൽ സിനിമ സംവിധായകനോട് രാം ഗോപാൽ വർമ
ഹൈദരാബാദ്: രൺബീർ കപൂർ ചിത്രം ആനിമൽ കണ്ട് എസ് എ രൂപത്തിൽ റിവ്യൂ എഴുതി നൽകി സംവിധായകൻ രാം ഗോപാൽ വർമ. മൂന്ന് പേജോളം വരുന്ന റിവ്യൂ ആണ് രാം ഗോപാൽ വർമ്മ ചിത്രത്തെ കുറിച്ച് എഴുതി നൽകിയത്. സംവിധായകന്റെ റിവ്യൂ ഇപ്പോൾ സമൂഹ മാധ്യമങ്ങളിൽ വൈറലായി ഓടിക്കൊണ്ടിരിക്കുകയാണ്. ആനിമലിന്റെ സംവിധായകനായ സന്ദീപ് റെഡ്ഡിയോട് അദ്ദേഹത്തിന്റെ കാലുകളുടെ ചിത്രം അയച്ചു തരാൻ റിവ്യൂവിൽ രാം ഗോപാൽ വർമ്മ പറയുന്നുണ്ട്. ഈ വാക്കുകളാണ് ഇപ്പോൾ ശ്രദ്ധേയമാകുന്നത്.
'സന്ദീപേ നിന്റെ കാലുകളുടെ ചിത്രം എനിക്ക് വാട്‌സാപ്പിൽ അയച്ചു തരൂ ഞാൻ അതൊന്ന് തൊട്ടോട്ടെ' എന്നാണ് രാം ഗോപാൽ വർമ പറയുന്നത്. ഈ സിനിമയിലെ രൺബീറിനെ പോലെ അഭിനയിക്കാൻ എല്ലാ ഭാഷകളിലുമുള്ള താരങ്ങളും ആഗ്രഹിക്കുമെന്നും, ഇനി വരുന്ന എഴുത്തുകാർക്കും സംവിധായകർക്കും ഈ സിനിമ ഒരു മാതൃകയാകുമെന്നും രാം ഗോപാൽ വർമ കുറിച്ചു.
അതേസമയം, ആനിമലിനെതിരെ ഒരു കൂട്ടം പ്രേക്ഷകർക്കിടയിൽ വലിയ രീതിയിൽ പ്രതിഷേധം ശക്തമാകുന്നുണ്ട്. അർജുൻ റെഡ്ഡി സംവിധായകനായ സന്ദീപ് റെഡ്ഡിയുടെ രണ്ടാമത്തെ ചിത്രമായ ആനിമലിൽ സ്ത്രീവിരുദ്ധതയുണ്ട് എന്ന് കാണിച്ചാണ് ഇപ്പോൾ പലരും രംഗത്തെത്തിയിരിക്കുന്നത്. അർജുൻ റെഡ്ഡിയിലും ധാരാളം വിമര്ശങ്ങള്ക്ക് വഴിവെച്ച നായകന്റെ സ്ത്രീവിരുദ്ധത ആനിമലിലും തുടരുന്നുവെന്നാണ് ഒരുകൂട്ടം പ്രേക്ഷകർ അഭിപ്രായപ്പെടുന്നത്.
ചിത്രത്തിലെ നായിക രശ്മിക മന്ദാനയോട് രൺബീർ പറയുന്ന ഡയലോഗ് ആണിത്. 'മാസത്തിൽ നാല് തവണ പാഡ് മാറ്റുന്ന നീ അതിന്റെ പേരിൽ ഡ്രാമ സൃഷ്ടിക്കുകയാണ്. ഇവിടെ ഞാൻ 50 എണ്ണമാണ് ഒരു ദിവസം മാറ്റുന്നത്', എന്നാണ് നായകൻ ഭാര്യയോട് പറയുന്നത്. ഭാര്യയുടെ ആർത്തവകാലത്തെ തന്റെ ആശുപത്രിവാസവുമായി താരതമ്യപ്പെടുത്തിയുള്ളതാണ് ഈ ഡയലോഗ്. ഇത് സ്ത്രീവിരുദ്ധതയാണ് എന്നാണ് പ്രേക്ഷകരിൽ പലരും വ്യകതമാക്കുന്നത്.
