കടം മേടിച്ച് മുങ്ങിയെന്നോ'? ഇതിലൊന്നും സത്യമില്ല; ഇവിടെ എന്നെപ്പറ്റി ഒരുപാട് ആരോപണങ്ങൾ വരുന്നുണ്ട്; സർപ്രൈസ് ഫേസ്‌ബുക്ക് ലൈവുമായി സൈജു കുറുപ്പ്
സൈജു കുറുപ്പ്, ശ്രിന്ദ, ദർശന എന്നിവരെ പ്രധാന കഥാപാത്രങ്ങളാക്കി നവാഗതനായ സിന്റോ സണ്ണി സംവിധാനം ചെയ്യുന്ന 'പാപ്പച്ചൻ ഒളിവിലാണ്' എന്ന ചിത്രത്തിന്റെ പ്രൊമോഷനുവേണ്ടി ചിത്രത്തിൽ ടൈറ്റിൽ കഥാപാത്രത്തെ അവതരിപ്പിച്ച സൈജു കുറുപ്പ് നടത്തിയ ഫേബ്‌സുക്ക് ലൈവാണ് ഇപ്പോൾ ആരാധകരുടെ ഇടയിലെ ചർച്ച വിഷയം.
''ഇവിടെ എന്നെപ്പറ്റി ഒരുപാട് ആരോപണങ്ങൾ വരുന്നുണ്ട്. നാട്ടുകാർ വെറുതെ ഇങ്ങനെ ഓരോന്ന് പറയുകയാണ്, എന്തിനാണെന്നറിയില്ല. ഞാനെന്തോ നാട്ടുകാരുടെ കൈയിൽ നിന്ന് കടം മേടിച്ചിട്ട് മുങ്ങി നടക്കുകയാണെന്ന് പറഞ്ഞുകൊണ്ട് നടക്കുകയാണ്. ഞാൻ ഒളിവിലാണെന്നോ അങ്ങനെ എന്തൊക്കെയോ പറയുന്നുണ്ട്. എന്തിനാണ് ഇങ്ങനെയൊക്കെ പറയുന്നത്? പിന്നെന്തോ കടം സ്റ്റാറെന്നോ, പ്രാരാബ്ധം സ്റ്റാറെന്നോ ഒക്കെ പറയുന്നുണ്ട്. കാശ് മേടിച്ച് ഒളിവിൽ പോയെന്നോ, കാശ് കൊടുക്കാൻ വയ്യാത്തതു കൊണ്ടെന്നോ ഒക്കെ പറയുന്നുണ്ട്. ഇതിലൊന്നും സത്യമില്ല. ഇതിൽ ആകെ സത്യമുള്ളത്, ഞാൻ ഒളിവിലായിരുന്നു. ഞാനെന്തിനാണ് ഒളിവിൽ പോയത്, ആരെ പേടിച്ചിട്ടാണ്.
ഇത് ഞാൻ ഉടനെ ലൈവിൽ വന്ന് പറയുന്നതായിരിക്കും. പക്ഷ ഇപ്പോൾ തൽക്കാലം എനിക്ക് സാമ്പത്തിക പ്രതിസന്ധിയൊന്നുമില്ല. ഞാൻ നമ്മുടെ കാഞ്ഞിരപ്പള്ളിയിലെ എസ്റ്റേറ്റൊക്കെ വിറ്റിട്ട് പടം നിർമ്മിക്കാൻ നോക്കുന്നയാളാണ്. അപ്പോൾ അങ്ങനെത്തെ പ്രശ്‌നമൊന്നുമില്ല, കടമൊന്നും ഞാൻ മേടിച്ചിട്ടില്ല. പക്ഷേ ഞാൻ എന്തിനാണ് ഒളിവിൽ പോയത്. അത് ഞാൻ ഉടനെ ക്ലിയറാക്കി എന്റെ ഫേസ്‌ബുക്ക് സുഹൃത്തുക്കളോട് പറയുന്നതായിരിക്കും'', ലൈവിൽ സൈജു കുറുപ്പ് പറഞ്ഞു.
ഫേസ്‌ബുക്ക് ലൈവിന്റെ സമയം നേരത്തെ അറിയിച്ചിരുന്ന പോസ്റ്റിൽ സിനിമയുടെ പേരും സൈജു കുറിച്ചിരുന്നു.
