ഹൈദരാബാദ്: ഇന്ത്യയിൽ ഒന്നാകെ തരംഗം സൃഷ്ടിച്ച ഗാനമാണ് സാമന്തയുടെ പുഷ്പയിലെ ഐറ്റം നമ്പർ ഊ ആണ്ടവാ. ഇപ്പോൾ ആ ഗാനരംഗം ചിത്രീകരിക്കുമ്പോൾ ഉണ്ടായിരുന്ന കാര്യങ്ങളെ കുറിച്ച് തുറന്നു പറയുകയാണ് നടി സാമന്ത. അത്രയ്ക്ക് എളുപ്പത്തിൽ അല്ല താൻ ആ ഗാനരംഗത്തിൽ അഭിനയിച്ചത് എന്നാണ് അവർ പറയുന്നത്.

എന്നാൽ ഗാനത്തിലെ ആദ്യ രംഗം ചിത്രീകരിക്കുന്ന സമയത്ത് താൻ പേടിച്ച് വിറയ്ക്കുകയായിരുന്നു എന്നാണ് താരം പറയുന്നത്. താൻ അത്ര സുന്ദരിയല്ല എന്ന ചിന്തയാണ് തനിക്ക് എപ്പോഴും ഉണ്ടായിരുന്നതെന്നും സാമന്ത. ഞാൻ അത്ര പോരെന്നും ഞാൻ സുന്ദരിയല്ലെന്നും മറ്റു പെൺകുട്ടികളെപ്പോലെ അല്ലെന്നുമുള്ള ചിന്തയാണ് എനിക്കെപ്പോഴും ഉണ്ടായിരുന്നത്. അതിനാൽ ഇത് എനിക്ക് വലിയ വെല്ലുവിളിയായിരുന്നു.

ഊ ആണ്ടവയുടെ ആദ്യ രംഗം ചിത്രീകരിക്കുമ്പോൾ പേടിച്ച് വിറയ്ക്കുകയായിരുന്നു ഞാൻ. കാരണം സെക്സിയാവുക എന്നത് എനിക്ക് പറ്റുന്നതായിരുന്നില്ല. പക്ഷേ എന്നെ സ്വയം ബുദ്ധിമുട്ടേറിയ സാഹചര്യങ്ങളിൽ കൊണ്ടുവന്ന് നിർത്തിക്കൊണ്ട് നടി എന്ന നിലയിലും വ്യക്തി എന്ന നിലയിലും ഞാൻ വളരാനാണ് ഞാൻ എന്നും ശ്രമിച്ചിട്ടുള്ളത്. - സാമന്ത പറഞ്ഞു.

എന്നാൽ ഇനി അത്തരം ഡാൻസ് നമ്പറിൽ താൻ പ്രത്യക്ഷപ്പെടില്ലെന്നും താരം വ്യക്തമാക്കി. അതിൽ താനിപ്പോൾ വെല്ലുവിളി കാണുന്നില്ല എന്നാണ് താരം പറയുന്നത്. അല്ലു അർജുൻ നായകനായി എത്തിയ പുഷ്പ സിനിമയിലെ ഗാനമായിരുന്നു ഊ ആണ്ടവ. ഐറ്റം നമ്പറായി എത്തിയ ഗാനം വലിയ രീതിയിൽ ഹിറ്റാവുകയായിരുന്നു.