ഗിയർ മാറ്റേണ്ട സമയമായെന്ന് എനിക്ക് മനസിലായി; എന്റെ ഹൃദയം എവിടെയാണോ അവിടേക്ക് ഞാൻ തിരിച്ചുവരുന്നു; ലണ്ടനിലെ ഉപരിപഠനം ഉപേക്ഷിച്ചു, സിനിമയിലേക്ക് തിരിച്ചുവരാൻ സാനിയ ഇയ്യപ്പൻ

ലണ്ടൻ: കുറഞ്ഞ സിനിമകളിൽ മാത്രമേ അഭിനയിച്ചിട്ടൂള്ളൂ എങ്കിലും സിനിമാ പ്രേമികളുടെ മനം കവർന്ന നടിയാണ് സാനിയ ഇയ്യപ്പൻ. എന്നാൽ, ചെയ്ത കഥാപാത്രങ്ങൾ അതിലെ മികവു കൊണ്ട് ശ്രദ്ധ നേടാനും താരത്തിന് സാധിച്ചിട്ടുണ്ട്. എന്നാൽ അടുത്തിടെയാണ് താരം സിനിമയിൽ നിന്ന് ഇടവേളയെടുക്കുന്നതായി അറിയിച്ചത്. ലണ്ടനിൽ ഉപരിപഠനത്തിന് പോകുന്നതിനായിട്ടാണ് താരം ബ്രേക്കെടുത്തത്. എന്നാൽ ഇപ്പോൾ സിനിമയിലേക്ക് തിരിച്ചുവരാനുള്ള തീരുമാനത്തിലാണ് സാനിയ.

ഇൻസ്റ്റഗ്രാം സ്റ്റോറിയായിട്ടാണ് താരം സിനിമയിലേക്ക് തിരിച്ചുവരുന്നതായി ആരാധകരെ അറിയിച്ചത്. സിനിമയിൽ അഭിനയിക്കാൻ അവധി ലഭിക്കാതായതോടെയാണ് ലണ്ടനിലെ പഠനം ഉപേക്ഷിച്ച് തിരിച്ചുവരാൻ താരം തീരുമാനിച്ചത്.

വലിയ കഥ ചെറുതായി പറയാം. ഉന്നത വിദ്യാഭ്യാസത്തിനായി ലണ്ടൻ എന്നെ വിളിച്ചു. പക്ഷേ സിനിമയോടുള്ള എന്റെ സ്നേഹത്തിന് മറ്റ് പദ്ധതികളുണ്ടായിരുന്നു. എന്റെ അധ്യായന ദിനങ്ങളും സിനിമയുടെ ഷെഡ്യൂളും ക്ലാഷ് ആയി. ലീവും കിട്ടിയില്ല. അതിനാൽ ഗിയർ മാറ്റേണ്ട സമയമായെന്ന് എനിക്ക് മനസിലായി. എന്റെ ഹൃദയം എവിടെയാണോ അവിടേക്ക് ഞാൻ തിരിച്ചുവരുന്നു. - എന്നാണ് സാനിയ കുറിച്ചത്.

യുകെയിലെ യൂണിവേഴ്സിറ്റി ഫോർ ദി ക്രീയേറ്റീവ് ആർട്സ് എന്ന സർവകലാശാലയിൽ ബിരുദം നേടാനുള്ള അവസരമാണ് സാനിയക്ക് ലഭിച്ചത്. മൊത്തം മൂന്നു വർഷമാണ് കോഴ്സ് ഉള്ളത്. ബിഎ (ഓണേഴ്‌സ്) ആക്ടിങ് ആൻഡ് പെർഫോമൻസ് എന്ന വിഷയമാണ് സാനിയ അയ്യപ്പൻ തെരഞ്ഞെടുത്തത്. മോഹൻലാലും പൃഥ്വിരാജും ഒന്നിക്കുന്ന എമ്പുരാനിൽ ഉൾപ്പടെ നിരവധി സിനിമകളിലാണ് സാനിയയ്ക്ക് അവസരമുള്ളത്. ഇത് ഒഴിവാക്കാൻ പറ്റാത്തതിനാലാണ് സാനിയ സിനിമ ലോകത്തേക്ക് തന്നെ തിരിച്ചുവരവ് നടത്തുന്നത്.