നിങ്ങൾ പറഞ്ഞാൽ വിമാനത്തിന് മുകളിൽ നിന്ന് നൃത്തം ചെയ്യും! മണിരത്‌നത്തിന് മുന്നിൽ അപേക്ഷയുമായി ഷാറൂഖ് ഖാൻ
മുംബൈ: ഷാറൂഖ് ഖാന്റെ എക്കാലത്തേയും മികച്ച ചിത്രങ്ങളിലൊന്നാണ് മണിരത്‌നം സംവിധാനം ചെയ്ത 'ദിൽ സെ'. 1998 ൽ പുറത്തിറങ്ങിയ ചിത്രം അന്ന് വൻ തരംഗമാണ് തീർത്തത്. ഇപ്പോഴും തലമുറ വ്യത്യാസമില്ലാതെയാണ് പ്രേക്ഷകർ 'ദിൽ സെ'യിലെ ഗാനങ്ങൾ നെഞ്ചിലേറ്റുന്നത്. ദിൽ സെ എന്ന ഹിറ്റ് ചിത്രത്തിന് ശേഷം ഷാറുഖ് ഖാനും മണിരത്‌നവും ഒന്നിച്ചിട്ടില്ല. ഇപ്പോഴിതാ മണിരത്‌നത്തിനോട് ഒരു അഭ്യർത്ഥനയുമായി ഷാറൂഖ് എത്തിയിരിക്കുകയാണ്. തന്നെ ഒരു ചിത്രത്തിൽ കാസ്റ്റ് ചെയ്യണമെന്നാണ് കിങ് ഖാൻ പറയുന്നത്. സി.എൻ.എൻ ന്യൂസ് 18 സംഘടിപ്പിച്ച ഒരു പരിപാടിയിലായിരുന്നു അഭ്യർത്ഥന. എസ്.ആർ.കെക്ക് മറുപടിയും മണിരത്‌നം നൽകിയിട്ടുണ്ട്.
'ഇപ്പോൾ എല്ലാം പുറത്തു വന്നിരിക്കുകയാണ്. ഞാൻ നിങ്ങളോട് അഭ്യർത്ഥിക്കുകയാണ്. അപേക്ഷിക്കുകയാണ്, ഞാൻ എപ്പോഴും പറയാറുള്ളതുപോലെ എന്നോടൊപ്പം ഒരു സിനിമ ചെയ്യണമെന്ന്. ഞാൻ വാക്കു തരുന്നു, നിങ്ങൾ പറയുകയാണെങ്കിൽ ഈ പ്രാവശ്യം വിമാനത്തിന്റെ മുകളിൽ നിന്ന് ഛയ്യ ഛയ്യ നൃത്തം ചെയ്യും'. ഷാറൂഖ് ഖാന്റെ വാക്കുകൾ പൊട്ടിച്ചിരിയോടെയാണ് കാണികൾ കേട്ടത്. 'ഞാൻ ഒരു വിമാനം വാങ്ങുമ്പോൾ' സിനിമ ചെയ്യാമെന്നായിരുന്നു മണിരത്‌നത്തിന്റെ മറുപടി.
ഇതുകേട്ട ഷാറൂഖ്, 'ഞാൻ? ഒരു വിമാനം വാങ്ങിയാലോ'? എന്ന് മണിരത്‌നത്തോട് തിരിച്ച് ചോദിക്കുന്നു. 'മണി, എന്റെ സിനിമകൾ ഇപ്പോൾ എങ്ങനെയാണ് പോകുന്നതെന്ന് അറിയാമല്ലോ? വിമാനം വിധൂരമല്ല, ഞാൻ വരുന്നു' ഷാറൂഖ് കൂട്ടിച്ചേർത്തു. 'ഞാൻ ശരിയാക്കിത്തരാം, വിഷമിക്കേണ്ട' എന്നായിരുന്നു മണിരത്‌നത്തിന്റെ ഉത്തരം.
2018 ൽ പുറത്തിറങ്ങിയ സീറോക്ക് ശേഷം ബോളിവുഡിൽ ശക്തമായി ഷാറൂഖ് ഖാൻ മടങ്ങിയെത്തിയിട്ടുണ്ട്. പോയവർഷം പുറത്തിറങ്ങി എസ്.ആർ.കെ ചിത്രമായ പത്താൻ, ജവാൻ, ഡങ്കി എന്നിവ വൻ വിജയമായിരുന്നു. 2500 കോടിയിലധികമാണ് ഈ മൂന്ന് ചിത്രങ്ങൾ ചേർന്ന് ബോക്‌സോഫീസിൽ നിന്ന് സമാഹരിച്ചത്. എന്നാൽ 2024 ൽ ഷാറൂഖ് പുതിയ ചിത്രങ്ങളൊന്നും പ്രഖ്യാപിച്ചിട്ടില്ല.
