കൊച്ചി: ഫാഷൻ ഡിസൈനറും നടൻ കുഞ്ചന്റെ മകളുമായ സ്വാതി കുഞ്ചൻ വിവാഹിതയായി. അഭിനന്ദ് ബസന്താണ് വരൻ. മലയാളം സിനിമാ ലോകത്തെ പ്രമുഖർ ചടങ്ങിൽ പങ്കെടുത്തു. മമ്മൂട്ടിയും മോഹൻലാലും ഉൾപ്പെടെയുള്ള താരങ്ങളെത്തി. കുടുംബസമേതമാണ് മമ്മൂട്ടി വിവാഹത്തിനെത്തിയത്. ഭാര്യ സുൽഫത്ത്. മകൻ ദുൽഖർ സൽമാൻ, മകൾ സുറുമി, ദുൽഖറിന്റെ ഭാര്യ അമാൽ എന്നിവരെല്ലാം ചടങ്ങിനെത്തി.

മോഹൻലാൽ, ശ്രീനിവാസൻ, ബാലചന്ദ്ര മേനോൻ, ബിന്ദു പണിക്കർ, കുഞ്ചക്കോ ബോബൻ എന്നിവരും ചടങ്ങിനെത്തി. ഫെമിന, നിത അംബാനിയുടെ ഹെർ സർക്കിൾ എന്നിവിടങ്ങളിൽ ജോലി ചെയ്തിട്ടുള്ള സ്വാതി ഇപ്പോൾ ഫ്രീലാൻസ് സ്‌റ്റൈലിസ്റ്റായി പ്രവർത്തിക്കുകയാണ്. ആദ്യം ഫെമിനയിലെ ഹെഡ് സ്‌റ്റൈലിസ്റ്റ് അക്ഷിത സിങ്ങിന് കീഴിലാണ് സ്വാതി പ്രവർത്തിച്ചിരുന്നത്. പിന്നീട് ഹെഡ് സ്‌റ്റൈലിസ്റ്റാകുകയായിരുന്നു. നിലവിൽ ലക്ഷങ്ങളാണ് പ്രതിഫലം വാങ്ങുന്നത്.

നാഷണൽ ഫാഷൻ ഇൻസ്റ്റിറ്റ്യൂട്ടിൽ നിന്ന് ഫാഷൻ കമ്യൂണിക്കേഷനിൽ ബിരുദം സ്വന്തമാക്കി. ഫെമിനയിലായിരുന്നു ഇന്റേൺഷിപ്പ്. ശേഷം ദുബായിയിൽ മനീഷ് മൽഹോത്രയ്ക്കൊപ്പം വില്ല 88-ൽ പ്രവർത്തിച്ചു. രണ്ട് വർഷത്തോളം ദുബായിൽ ഫാഷൻ ഷോകളിൽ പ്രവർത്തിച്ചു. പിന്നീട് ഇന്ത്യയിലേക്ക് തിരിച്ചെത്തി ഫെമിനയിൽ ഫാഷൻ സ്‌റ്റൈലിസ്റ്റായി തുടക്കം കുറിച്ചു.

ഹെഡ് സ്‌റ്റൈലിസ്റ്റായതോടെ മാസികയുടെ മുഖചിത്രങ്ങൾക്കുള്ള മോഡലുകളെ ഒരുക്കി. നിത അംബാനി, ദീപിക പദുക്കോൺ, അദിതി റാവു ഹൈദരി, സൂസെയ്ൻ ഖാൻ എന്നിവർക്കൊപ്പം പ്രവർത്തിച്ചു. കുഞ്ചന്റേയും ശോഭയുടേയും ഇളയ മകളാണ് സ്വാതി. ശ്വേതയാണ് മറ്റൊരു മകൾ. ഹെയർ ആൻഡ് മേക്കപ്പ് ആർട്ടിസ്റ്റാണ് ശ്വേത.