ധ്യാൻ പ്രധാനമായും പറഞ്ഞത് മകന്റെ വായിൽ ആരും കുത്തിക്കയറ്റില്ല എന്നാണ്; എന്നാൽ കയറ്റും, എന്റെ വായിൽ കുത്തികയറ്റിയിട്ടുണ്ട്; ധ്യാൻ തന്നെ തള്ളിപ്പറഞ്ഞതല്ല, പറഞ്ഞ നല്ല കാര്യങ്ങളെല്ലാം കട്ട് ചെയ്തു; വിവാദങ്ങളിൽ പ്രതികരിച്ച് ടിനി ടോം
കൊച്ചി: സിനിമാ മേഖലയിലെ ലഹരി ഉപയോഗത്തെക്കുറിച്ച് നടൻ ടിനി ടോം പറഞ്ഞ വാക്കുകൾ ഏറെ വിവാദങ്ങൾക്ക് ഇടയാക്കിയിരുന്നു. നടന്റെ പ്രസ്താവനയ്ക്ക് പിന്നാലെ ധ്യാൻ ശ്രീനിവാസൻ തന്റെ വിയോജിപ്പും പങ്കുവെച്ചിരുന്നു. ഇപ്പോഴിതാ ആ വിവാദത്തിൽ പ്രതികരിച്ചിരിക്കുകയാണ് ടിനി ടോം.ധ്യാൻ ഒരിക്കലും തന്നെ തള്ളി പറയുകയില്ലെന്നും അദ്ദേഹം പറഞ്ഞ നല്ല കാര്യങ്ങൾ ഒഴിവാക്കിയെന്നും നടൻ പറഞ്ഞു.
താൻ ഒരിക്കലും കയ്യടി നേടാനായി ഒന്നും പറഞ്ഞിട്ടില്ലെന്നും സഹപ്രവർത്തകരെ മോശക്കാരാക്കാൻ ആയിരുന്നില്ല താൻ പ്രസ്താവന നടത്തിയത് എന്നും നടൻ കൗമദി ടിവിക്ക് നൽകിയ അഭിമുഖത്തിൽ വ്യക്തമാക്കി. 'ഞാൻ പറഞ്ഞതിനോട് ആദ്യം എതിർപ്പുമായി വന്നത് ധ്യാനാണ്. ടിനി ചേട്ടനെതിരെയല്ല താൻ സംസാരിച്ചത് എന്ന് ധ്യാൻ തന്റെ സുഹൃത്തുക്കളോട് പറഞ്ഞിട്ടുണ്ട്. ധ്യാൻ പറഞ്ഞതിൽ പ്രധാനമായും പറഞ്ഞത് മകന്റെ വായിൽ ആരും കുത്തിക്കയറ്റില്ല എന്നാണ്. എന്നാൽ കയറ്റും. എന്റെ വായിൽ കുത്തികയറ്റിയിട്ടുണ്ട്. ഒന്ന് ടെസ്റ്റ് ചെയ്തു നോക്ക് എന്ന് പറഞ്ഞാണ് അത് ചെയ്തത്.
എന്റെ മകൻ തന്നെ ആണല്ലോ. അവനും ചിലപ്പോൾ അവരുടെ കൂട്ടത്തിൽ നിൽക്കുമ്പോൾ ഇതുപോലെയുണ്ടാകുമെന്ന് സംശയിക്കാം. സിനിമാക്കാരല്ലാത്ത എന്റെ വീട്ടുകാർക്ക് ഭയമുണ്ടാകും', ടിനി ടോം പറഞ്ഞു.'ധ്യാനിന്റെ അഭിമുഖത്തിൽ ലഹരി ഉപയോഗിച്ചതിന് വീട്ടിൽ നിന്നും പുറത്തായത് അടക്കം പറയുന്നുണ്ട്. അത് അടക്കം ധ്യാൻ പറഞ്ഞ നല്ല കാര്യങ്ങളൊന്നും വന്നില്ല. ധ്യാൻ ടിനിയെ തള്ളി എന്നത് മാത്രമാണ് വന്നത്. ധ്യാൻ ഒരിക്കലും തള്ളില്ല. കാരണം ധ്യാനിന് കാര്യങ്ങളറിയാം. അതുപോലെ നടന്റെ പേര് പറയ് എന്ന് എല്ലാവരും പറയുന്നു. അദ്ദേഹത്തെ നമുക്ക് നാളെ വേണം.
റോൾ മോഡൽ ഒരിക്കലും മോശം മാതൃക ആകരുത് എന്നാണ് ഞാൻ പറഞ്ഞത്. അയാളുടെ പേര് പറഞ്ഞിട്ടെന്താണ് നമുക്ക് രക്ഷിക്കേണ്ടത് സമൂഹത്തെയാണ്', ടിനി ടോം കൂട്ടിച്ചേർത്തു.
