കൊച്ചി: നാളെ റിലീസിന് ഒരുങ്ങുന്ന മമ്മൂട്ടി ചിത്രം ടർബോ പ്രേക്ഷകർക്ക് ഏറെ പ്രതീക്ഷ നല്കുന്ന ചിത്രമാണ്. ആക്ഷൻ മോദിലേക്ക് നടൻ തിരിച്ചെത്തുന്നതിന്റെ ആവേശത്തിലാണ് ആരാധകർ. അതുകൊണ്ട് തന്നെ ട്രെയിലർ പുറത്തുവന്നപ്പോൾ മുതൽ വലിയ ആവേശമാണ് എങ്ങും. മലയാള സിനിമയിലെ വലിയ ഹിറ്റായി ചിത്രം മാറുമെന്നാണ് കണക്കുകൂട്ടൽ. ആ പ്രതീക്ഷയിൽ ടർബോയുടെ അഡ്വാൻസ് ബുക്കിങ് കളക്ഷനിൽ വൻ കുതിപ്പ് എന്നാണ് റിപ്പോർട്ടുകൾ.

മമ്മൂട്ടിയുടേതായി കാത്തിരിക്കുന്ന ടർബോ സിനിമയുടെ ടിക്കറ്റുകൾ മുൻകൂറായി വിറ്റതിൽ നിന്ന് 2.60 കോടി രൂപയാണ് ലഭിച്ചിരിക്കുന്നത്. ഭീഷ്മ പർവത്തിന്റെ റെക്കോർഡാണ് പുതിയ ചിത്രം തിരുത്തിയിരിക്കുന്നത്. കേരളത്തിൽ മാത്രമല്ല ലോകമെമ്പാടും ചിത്രത്തിന്റെ ടിക്കറ്റ് ബുക്കിങ്ങ് അതിവേഗത്തിലാണ് നടക്കുന്നതെന്നാണ് റിപ്പോർട്ട്. സംവിധാനം നിർവഹിക്കുന്നത് വൈശാഖും ചിത്രത്തിന്റെ തിരക്കഥ മിഥുൻ മാനുവൽ തോമസും ആണ്.

ജോസ് എന്ന നായക കഥാപാത്രമായി ചിത്രത്തിൽ മമ്മൂട്ടി എത്തുമ്പോൾ മറ്റ് സുപ്രധാന വേഷങ്ങളിൽ കന്നഡയിലെ രാജ് ബി ഷെട്ടിയും തെലുങ്ക് നടൻ സുനിലുമാണ് ഉള്ളത്. ആക്ഷന് ഏറെ പ്രാധാന്യം നൽകിയാണ് മമ്മൂട്ടിയുടെ ചിത്രം ഒരുക്കുന്നത്. വിയറ്റ്‌നാം ഫൈറ്റേർസാണ് നിർണായകമായ ആക്ഷൻ രംഗങ്ങൾ കൈകാര്യം ചെയ്യുന്നത്. നിർമ്മാണം മമ്മൂട്ടി കമ്പനിയുടെ ബാനറിലാണ്.

ക്രിസ്റ്റോ സേവ്യറാണ് പശ്ചാത്തല സംഗീതം. 200 കിമീ സ്പീഡ് ചേസിങ് വരെ ചിത്രീകരിക്കാൻ സാധിക്കുന്ന ഹോളിവുഡിലെ ചേസിങ് സീനുകളിൽ ഉപയോഗിക്കുന്ന ഡിസ്പ്ലേ മോഷൻ ബ്ലർ മെഷർമെന്റിന് അനുയോജ്യമായ 'പർസ്യുട്ട് ക്യാമറ'യാണ് 'ടർബോ'യിൽ ഉപയോഗിച്ചിരിക്കുന്നത്. ഛായാഗ്രഹണം വിഷ്ണു ശർമ്മ. എക്‌സിക്യൂട്ടീവ് പ്രൊഡ്യുസർ: ജോർജ് സെബാസ്റ്റ്യൻ, പ്രൊഡക്ഷൻ ഡിസൈനർ ഷാജി നടുവിൽ, ലൈൻ പ്രൊഡ്യൂസർ സുനിൽ സിങ്, പ്രൊഡക്ഷൻ കൺട്രോളർ: ആരോമ മോഹൻ, ഡിസൈനർ മെൽവി ജെ & ആഭിജിത്ത്, മേക്കപ്പ് റഷീദ് അഹമ്മദ് & ജോർജ് സെബാസ്റ്റ്യൻ, കോ ഡയറക്ടർ ഷാജി പടൂർ, കോസ്റ്റ്യൂം ആക്ഷൻ ഡയറക്ടർ ഫൊണിക്‌സ് പ്രഭു, ചീഫ് അസോസിയേറ്റ് ഡയറക്ടർ രാജേഷ് ആർ കൃഷ്ണൻ, പബ്ലിസിറ്റി ഡിസൈൻസ് യെല്ലോ ടൂത്ത്, ഡിജിറ്റൽ മാർക്കറ്റിങ് വിഷ്ണു സുഗതൻ, പിആർഒ ശബരി എന്നിവരാണ്.