അയ്യപ്പ സ്വാമിയെ വരയ്ക്കാൻ പറഞ്ഞപ്പോൾ വരച്ചത് മാളികപ്പുറം സിനിമയിലെ ഉണ്ണി മുകുന്ദനെ; കരുന്നു വരച്ച ചിത്രം പങ്കുവെച്ച് നടൻ

കൊച്ചി: ഓട്ടിസം ബാധിച്ച ഒരു കുട്ടി വരച്ച ചിത്രം സോഷ്യൽ മീഡിയയിൽ പങ്കുവെച്ച് നടൻ ഉണ്ണി മുകുന്ദൻ. അനഘ എന്ന കുട്ടിയുടെ അമ്മയായ ഉമ രാജീവിന്റെ പോസ്റ്റാണ് താരം തന്റെ പേജിൽ പങ്കുവെച്ചത്. മകൾ ഓട്ടിസം എന്ന അവസ്ഥയിൽ നിന്ന് ഏകദേശം പുറത്തുവന്നെന്നും കുറച്ചുനാളായി ചിത്രങ്ങൾ വരയ്ക്കാറുണ്ടെന്നും ഫേസ്‌ബുക്ക് പോസ്റ്റിൽ അമ്മ പറയുന്നു.

മകളോട് അയ്യപ്പസ്വാമിയുടെ ചിത്രം വരയ്ക്കാൻ പറഞ്ഞപ്പോൾ മാളികപ്പുറം സിനിമയിലെ ഉണ്ണി മുകുന്ദന്റെ കഥാപാത്രത്തെയും അതിലെ കുട്ടികളായി അഭിനയിച്ചവരുടെയും ചിത്രമാണ് വരച്ചതെന്ന് ഉമ രാജീവ് പറഞ്ഞു. മകൾ വരച്ച ചിത്രത്തോടൊപ്പമാണ് ഉമ രാജീവ് കുറിപ്പ് പങ്കുവെച്ചത്. ഉണ്ണി മുകുന്ദൻ ചിത്രം കാണുന്നതുവരെയും ഷെയർ ചെയ്യാമോയെന്നും ഉമ കുറിപ്പിൽ ആവശ്യപ്പെടുന്നുണ്ടായിരുന്നു.

ഫേസ്‌ബുക്ക് പോസ്റ്റിന്റെ പൂർണരൂപം

ഇന്നത്തെ പ്രഭാതം തുടങ്ങിയത് തന്നെ വളരെ സന്തോഷത്തോടെയാണ്. എന്റെ മകൾക്ക് ഓട്ടിസം എന്ന അവസ്ഥയുണ്ട്. ഇപ്പോൾ അവൾ അതിൽ നിന്ന് ഏകദേശം പുറത്തുവന്നിരിക്കുന്നു. അവൾ ചിത്രം വരയ്ക്കാൻ തുടങ്ങിയിട്ട് കുറച്ചു നാളുകളായി. ഇന്ന് രാവിലെ ഞാൻ അവളോട് അയ്യപ്പ സ്വാമിയുടെ ചിത്രം വരയ്ക്കാൻ പറഞ്ഞു. അപ്പോൾ അവൾ വരച്ച ചിത്രമാണ് താഴെയുള്ളത്.

അവളുടെ മനസിലുള്ള അയ്യപ്പ സ്വാമിയും കുട്ടികളും. എന്റെ അനഘ ആദ്യമായി തിയേറ്ററിൽ വന്നിരുന്ന് കണ്ട സിനിമയും മാളികപ്പുറമാണ്. ഒത്തിരി ഒത്തിരി സന്തോഷം തോന്നി മനസിന്. കഴിയുമെങ്കിൽ ഇതൊന്ന് ഷെയർ ചെയ്യാമോ. ഉണ്ണി മുകുന്ദൻ ഏത് വിധേനയും ഇത് കാണാൻ ഇടയായാൽ എന്റെ കുഞ്ഞിന് കിട്ടുന്ന സമ്മാനമാകും ഇത്.