മൊയ്തീൻ ഞാൻ ചെയ്യേണ്ടതായിരുന്നു, കഥ കേട്ടിട്ട് ഒരുപാട് കരഞ്ഞു; ആ കഥാപാത്രം കൈവിട്ട കഥ പറഞ്ഞ് ഉണ്ണി മുകുന്ദൻ

കൊച്ചി: സിനിമാ പ്രേക്ഷകർ ഇരുകൈയും നീട്ടി സ്വീകരിച്ച സിനിമയാണ് 'എന്ന് നിന്റെ മൊയ്തീൻ'. പൃഥ്വിരാജിന്റെ കരിയറിലെ തന്നെ ഏറ്റവും മികച്ചതെന്ന് അടയാളപ്പെടുത്തിയ സിനിമകളിൽ ഒന്നായിരുന്നു ഇത്. ഇപ്പോഴിതാ മൊയ്തീൻ എന്ന കഥാപാത്രത്തിന് വേണ്ടി സംവിധായകൻ ആദ്യം സമീപിച്ചത് തന്നെ ആയിരുന്നുവെന്ന് പറയുകയാണ് ഉണ്ണി മുകുന്ദൻ.

പൃഥ്വിരാജിന്റെ മാത്രമല്ല ടൊവിനോ തോമസിന്റെ കരിയർ ബ്രേക്ക് കൂടിയായിരുന്നു ഈ സിനിമ. കാഞ്ചനമാലയുടെയും ബി.പി മൊയ്തീന്റെയും യഥാർത്ഥ ജീവിത കഥയെ ആസ്പദമാക്കി പുറത്തിറങ്ങിയ ചിത്രം ബോക്‌സ് ഓഫീസിൽ വലിയ വിജയമായിരുന്നു. ഇപ്പോഴിതാ സിനിമയിൽ പൃഥ്വിരാജ് ചെയ്ത മൊയ്തീൻ എന്ന കഥാപാത്രത്തിന് വേണ്ടി സംവിധായകൻ ആദ്യം സമീപിച്ചത് തന്നെ ആയിരുന്നുവെന്ന് പറയുകയാണ് ഉണ്ണി മുകുന്ദൻ. ആർ.എസ് വിമൽ കഥയും തിരക്കഥയും രചിച്ച് നിർമ്മിക്കുന്ന ശശിയും ശകുന്തളയും എന്ന ചിത്രത്തിന്റെ ട്രെയിലർ ലോഞ്ചിൽ പങ്കെടുന്ന സമയത്താണ് ഉണ്ണി മുകുന്ദൻ ഇക്കാര്യം പറഞ്ഞത്.

''എനിക്ക് വിമലുമായി നല്ല ബന്ധമാണ് ഉള്ളത്. മൊയ്തീന്റെ കഥ കേട്ടിട്ട് ഞാൻ ഒരുപാട് കരഞ്ഞു. പക്ഷെ, കഥ പറഞ്ഞ ശേഷം വിമൽ പോയി. എന്നാൽ പപ്പേട്ടന്റെ സിനിമ ഞാൻ ചെയ്തു കൊണ്ടിരിക്കുകയായിരുന്നു. വിമലിന്റെ പടം ചെയ്യാതിരിക്കാൻ ഒരു കാരണമേയുള്ളു. എന്റെ അന്നത്തെ അവസ്ഥ വെച്ചിട്ട് ഈ സിനിമയുമായി വിമലിന് മുന്നോട്ട് പോകാൻ കഴിയുമോ എന്ന് സംശയം തോന്നി.

ഒരുപാട് വർഷത്തെ റിസർച്ച് ഒക്കെ ചെയ്തിട്ടാണ് വിമൽ ഇത് ചെയ്യുന്നത്. എന്നെ വച്ചാൽ ആ ബജറ്റിലോ ക്യാൻവാസിലോ ചിത്രം ചെയ്യാൻ പറ്റുവോ എന്ന് തോന്നി. സിനിമാ ഇത്രയും വലിയ ലെവലിൽ എത്തിയത് ആ സിനിമയിലെ നായകൻ പൃത്ഥ്വിരാജും ആ സിനിമയിൽ അഭിനയിച്ചത് ടൊവിനോയുമെല്ലാം ആയതുകൊണ്ടാണ്. എന്റെ കരിയറിൽ അങ്ങനെ കുറേ തീരുമാനങ്ങൾ എനിക്ക് എടുക്കേണ്ടി വന്നു. ഒരു സിനിമ നന്നാവണമെങ്കിൽ അതിന് ആവശ്യമായ ചിലർ വരണം. ചിലപ്പോൾ എന്റെ ഏറ്റവും ബെസ്റ്റ് വിമലിന്റെ അടുത്ത പടം ആയിരിക്കും...'' ഉണ്ണി മുകുന്ദൻ പറഞ്ഞു.

ബിച്ചാൾ മുഹമ്മദ് സംവിധാനം ചെയ്യുന്ന 'ശശിയും ശകുന്തളയും' 1970-75 കാലഘട്ടങ്ങളിൽ നടക്കുന്ന ട്യൂട്ടോറിയൽ കോളേജുകളാണ്. രണ്ടു പാരലൽ കോളേജുകൾ തമ്മിലുള്ള പകയും അവിടെ അദ്ധ്യാപകരായി എത്തുന്ന ഇംഗ്ലീഷ് അദ്ധ്യാപകൻ ശശിയും കണക്ക് അദ്ധ്യാപിക ശകുന്തളയും തമ്മിലുള്ള പ്രണയവുമെല്ലാമാണ് ശശിയും ശകുന്തളയും എന്ന ചിത്രം പറയുന്നത്.