കൊച്ചി: വാലിബന്റെ റിലീസിന് ഇനി 12 ദിവസം ബാക്കി നിൽക്കെ ആരാധകരെ ഞെട്ടിച്ചിരിക്കുകയാണ് മോഹൻലാൽ. 'ഞാൻ ഇതിനെ വാലിബൻ ചലഞ്ച് എന്ന് പറയുന്നു, നിങ്ങൾ വെല്ലുവിളി സ്വീകരിക്കുന്നുണ്ടോ? എന്ന ക്യാപ്ഷനോടെയാണ് വീഡിയോ. ആരാധകർ വീഡിയോ മിനിറ്റുകൾക്കുള്ളിൽ തന്നെ ഏറ്റെടുത്തു കഴിഞ്ഞു. ട്രെയ്ലറിലെ "കൺകണ്ടത് നിജം..' എന്ന മോഹൻലാലിന്റെ ശബ്ദം ബാക്ക്ഗ്രൗണ്ടിലൂടെ തുടങ്ങുന്ന വീഡിയോ ആദ്യ പോസ്റ്റർ ലുക്കിന് സമാനമായ പോസിലൂടെ അവസാനിക്കുകയാണ്. ഒരു റീൽ ചലഞ്ചിനുള്ളതാണ് ഈ വീഡിയോ.

ജനുവരി 25നാണ് ആഗോളതലത്തിൽ 'മലൈക്കോട്ടൈ വാലിബൻ' തിയേറ്ററിൽ എത്തുന്നത്. ബംഗാളി നടി കഥ നന്ദി, സൊനാലി കുൽക്കർണി, ഹരീഷ് പേരടി, മണികണ്ഠ രാജൻ, രാജീവ് പിള്ള, ഡാനിഷ് സെയ്ത്, ഹരിപ്രശാന്ത് വർമ, സുചിത്ര നായർ, മനോജ് മോസസ് തുടങ്ങിയവർ ചിത്രത്തിൽ പ്രധാന കഥാപാത്രങ്ങളായുണ്ട്. ഇവരെക്കൂടാതെ ഇന്ത്യയിലെ പ്രശസ്തരായ താരങ്ങളാണ് വാലിബനുവേണ്ടി അണിനിരക്കുന്നത് എന്നാണ് റിപ്പോർട്ട്. മോഹൻലാലിനെ മാത്രമല്ല ഹരീഷ് പേരടി ഉൾപ്പെടെയുള്ള മറ്റു താരങ്ങളെയും ഗംഭീര മേക്കോവറിലാണ് സംവിധായകൻ അവതരിപ്പിക്കുന്നത്.

മലയാള സിനിമയുടെ ഏറ്റവും വലിയ ഓവർസീസ് റിലീസിനാണ് മലൈക്കോട്ടൈ വാലിബൻ ഒരുങ്ങുന്നത്. റിലീസാകുന്ന ആദ്യ വാരം തന്നെ 175ൽപരം സ്‌ക്രീനുകളിലാണ് ഓവർസീസിൽ ചിത്രം പ്രദർശിപ്പിക്കുന്നത്. റിപബ്ലിക് ദിനമായ റിലീസ് ദിവസത്തിന് ശേഷമുള്ള മൂന്ന് ദിവസവും അവധി ദിവസങ്ങളാണ്. അതുകൊണ്ടുതന്നെ ഹൈപ്പിനൊത്ത് സിനിമ പ്രതികരണങ്ങൾ നേടിയാൽ കേരള ബോക്‌സ് ഓഫീസിൽ മോഹൻലാലിന്റെ അടുത്ത വിസ്മയമാകും വാലിബൻ എന്നാണ് വിലയിരുത്തൽ.