'നിരവധി തവണ ബോഡി ഷെയ്മിങ് നേരിടേണ്ടി വന്നിട്ടുണ്ട്; എന്നാൽ ഞാൻ ഹാപ്പിയാണ്... കാരണം ആരാധകർ എന്നെ അംഗീകരിച്ചു എന്നതാണ്: വിജയ് സേതുപതി

ചെന്നൈ: തനിക്ക് നേരിടേണ്ടി വന്ന ബോഡി ഷെയ്മിങ്ങിനെക്കുറിച്ച് നടൻ വിജയ് സേതുപതി. നിരവധി തവണ ബോഡി ഷെയ്മിങ് നേരിടേണ്ടി വന്നിട്ടുണ്ടെന്നും എന്നാൽ ആളുകൾ തന്നെ എന്താണെന്ന് മനസിലാക്കി സ്‌നേഹിച്ചെന്നും അതിൽ ഒരുപാട് സന്തോഷമുണ്ടെന്നും നടൻ അടുത്തിടെ നൽകിയ അഭിമുഖത്തിൽ പറഞ്ഞു.

'ആരാധകരുടെ സ്‌നേഹം വളരെ സത്യസന്ധമാണ്. എനർജി ഡ്രിങ്ക് പോലെയാണ് എനിക്ക് തോന്നുന്നത്. പ്രേക്ഷകരുടെ സ്‌നേഹം ലഭിക്കുമ്പോഴാണ് നമ്മൾ ശരിയായ പാതയിലാണ് പോകുന്നതെന്ന് മനസിലാകുക. അതെനിക്ക് എപ്പോഴും ഊർജ്ജം നൽകുന്ന കാര്യമാണ്' വിജയ് സേതുപതി പറഞ്ഞു

'നിരവധി തവണ ബോഡി ഷെയ്മിങ് നേരിടേണ്ടി വന്നിട്ടുണ്ട്. എന്നാൽ അതിൽ ഏറ്റവും നല്ല കാര്യം, ഞാൻ എങ്ങനെയാണോ അങ്ങനെതന്നെ ആളുകൾ എന്നെ അംഗീകരിച്ചുവെന്നതാണ്. ഞാൻ എവിടെ പോയാലും ആളുകൾ ഉൾക്കൊള്ളുന്നുണ്ട്. അതൊരു അനുഗ്രഹമാണ്. അതിൽ ഇന്ന് ഞാൻ ഏറെ സന്തോഷവാനാണ്.

വസ്ത്രധാരണത്തിന്റെ കാര്യത്തിൽ ചിലപ്പോഴൊക്കെ ഞാൻ ബോധവാനാകാറുണ്ട്. ചിലപ്പോൾ ആളുകൾ പറയും ഞാൻ ഷോ ഓഫ് ചെയ്യുകയാണെന്ന്, മറ്റു ചിലർ പറയും ഞാൻ വളരെ സിമ്പിളാണെന്ന്. ചപ്പൽ ഇടുന്നുണ്ടെന്ന് കരുതി എങ്ങനെയാണ് സിമ്പിളാവുക. ഞാൻ പരിപാടികൾക്ക് പോകുമ്പോൾ എല്ലാവരും നല്ല വേഷം ധരിച്ചായിരിക്കും വന്നിട്ടുണ്ടാവുക. അതിനാൽ ഞാൻ പരിപാടികൾക്ക് പോകാറില്ല' താരം കൂട്ടിച്ചേർത്തു.