'വർഷങ്ങൾക്ക് ശേഷം' ടീമിനൊപ്പമുള ചിത്രം പങ്കുവെച്ച് വിനീത് ശ്രീനിവാസൻ; ഏറ്റെടുത്ത് ആരാധകർ; ഡബ്ബിങ് പുരോഗമിക്കുന്നു

കൊച്ചി: ഹൃദയം എന്ന സിനിമയ്ക്ക് ശേഷം പ്രണവ് മോഹൻലാലിനെ നായകനാക്കി വിനീത് ശ്രീനിവാസൻ സംവിധാനം ചെയ്യുന്ന വർഷങ്ങൾക്ക് ശേഷം എന്ന സിനിമ അതിന്റെ ചിത്രീകരണം പൂർത്തിയാക്കി പോസ്റ്റ് പ്രൊഡക്ഷൻ വർക്കുകൾ നടക്കുകയാണ്. നിവിൻ പോളി അതിഥി വേഷത്തിലെത്തുന്ന ചിത്രത്തിൽ കല്യാണി പ്രിയദർശൻ, ധ്യാൻ ശ്രീനിവാസൻ, അജു വർഗീസ്, ബേസിൽ ജോസഫ്, നീരജ് മാധവ്, നീത പിള്ള തുടങ്ങി ഒരു നീണ്ട താരനിര തെന്നയുണ്ട്.

സിനിമയുടെ ഡബ്ബിങ് ഇപ്പോൾ ചെന്നൈയിൽ പുരോഗമിച്ചുകൊണ്ടിരിക്കുകയാണ്. താരങ്ങൾക്കൊപ്പമുള്ള ചിത്രം സോഷ്യൽ മീഡിയയിൽ പങ്കുവെച്ചിരിക്കുകയാണ്. ''വർഷങ്ങൾക്ക് ശേഷം'' എന്ന ഹാഷ് ടാഗോടെ പ്രണവ് മോഹൻലാലിനും നിവിൻ പോളിക്കും ധ്യാൻ ശ്രീനിവാസനും ഒപ്പം നിൽക്കുന്ന ഒരു ഫോട്ടോയാണ് താരം പങ്കുവെച്ചിരിക്കുന്നത്.

ഫസ്റ്റ് ലുക്ക് പോസ്റ്ററും പിന്നീട് അജു വർഗീസിന് ജന്മദിനാശംസകൾ നേർന്നുള്ള ഒരു ക്യാരക്ടർ പോസ്റ്ററും മാത്രമാണ് ഇതുവരെ സിനിമയുമായി ബന്ധപ്പെട്ട് പുറത്തുവിട്ടിട്ടുള്ളത്. പ്രണവും വിനീതും ഇതിന് മുമ്പ് അഭിനയിച്ച് റിലീസ് ചെയ്ത ഹൃദയം തിയേറ്ററുകളിൽ വൻ വിജയമായിരുന്നു. അതുപോലെ നിവിനൊപ്പം വിനീത് ചെയ്ത പടങ്ങൾ എല്ലാം സൂപ്പർഹിറ്റും ആയിരുന്നു.