പാലക്കാട്: 'ഹാദിയയുടെ ജീവൻ സംരക്ഷിക്കാൻ സർക്കാർ അടിയന്തരമായി ഇടപെടുക' എന്നാവശ്യപ്പെട്ട് സോളിഡാരിറ്റി, എസ്.ഐ.ഒ, ജി.ഐ.ഒ ജില്ല കമ്മിറ്റികൾ സംയുക്തമായി കലക്ടറേറ്റിലേക്ക് നടത്തിയ മാർച്ചിൽ പ്രതിഷേധമിരമ്പി. സ്റ്റേഡിയം പരിസരത്ത് നിന്ന് ആരംഭിച്ച മാർച്ചിൽ നൂറുകണക്കിന് വിദ്യാർത്ഥി -യുവജനങ്ങൾ അണിനിരന്നു. സിവിൽ സ്റ്റേഷനു മുന്നിൽ നടന്ന പ്രതിഷേധ പൊതുയോഗം എഫ്.ഐ.ടി.യു സംസ്ഥാന ജനറൽ സെക്രട്ടറി ജോസഫ് ജോൺ ഉദ്ഘാടനം ചെയ്തു.

ഹാദിയയുടെ സംരക്ഷണ ചുമതല സംസ്ഥാന സർക്കാരിനാണെന്ന് സുപ്രീംകോടതി ആവർത്തിച്ച് വ്യക്തമാക്കിയിരിക്കേ ഉത്തരവാദിത്വം നിറവേറ്റാൻ സർക്കാർ തയ്യാറാകണം. ശാരീരികവും മാനസികവുമായ സുസ്ഥിതി ഉറപ്പാക്കി ഹാദിയയെ സുരക്ഷിതമായി സുപ്രീം കോടതിയിൽ ഹാജരാക്കാൻ സർക്കാർ മുൻകൈയെടുക്കണം.എന്നാൽ സംഘ്പരിവാറിന് വിടുവേല ചെയ്യുന്ന ഏജന്റുകളായി സംസ്ഥാന സർക്കാറും പൊലീസും അധപതിച്ചിരിക്കുകയാണെന്നും അദ്ദേഹം പറഞ്ഞു. പൗരവകാശ, ഭരണഘടന ലംഘനങ്ങളാണ് ഹാദിയയുടെ വിഷയത്തിൽ നടന്നിരിക്കുന്നതെന്നും അവരുടെ വിശ്വാസം സംരക്ഷിക്കാനും ജീവിക്കാനുള്ള അവകാശത്തിനു വേണ്ടിയും പൊതു സമൂഹം പ്രതികരിക്കണമെന്നും അദ്ദേഹം ആവശ്യപ്പെട്ടു. സോളിഡാരിറ്റി ജില്ല പ്രസിഡന്റ് എ.കെ നൗഫൽ അധ്യക്ഷത വഹിച്ചു.

ഉത്തരവാദിത്വപ്പെട്ട കമീഷനുകൾ പോലും വിഷയത്തിൽ കുറ്റകരമായ നിസംഗതയും വിവേചനവും പുലർത്തിയെന്ന് മുഖ്യപ്രഭാഷണം നിർവഹിച്ച സോളിഡാരിറ്റി സംസ്ഥാന പ്രതിനിധി സഭാംഗം ജമാൽ പാനായിക്കുളം ചൂണ്ടിക്കാട്ടി. ദേശീയ വനിത കമീഷൻ അധ്യക്ഷയുടെ കഴിഞ്ഞദിവസത്തെ സന്ദർശനവും സംഘ്പരിവാർ കുപ്രചരണങ്ങൾക്ക് കുടപിടിക്കുന്ന പ്രസ്താവനയും ഇതിന്റെ ഒടുവിലത്തെ ഉദാഹരണമാണെന്നും അദ്ദേഹം പറഞ്ഞു.

എൻ.എ.പി.എം ദേശീയ കൺവീനർ വിളയോടി വേണുഗോപാൽ,എസ്. ഐ.ഒ സംസ്ഥാന സെക്രട്ടറി ഇ.എം അംജദ് അലി, ജമാ അത്ത് വനിത വിഭാഗം ജില്ല വൈസ് പ്രസിഡന്റ് ഹബീബ മൂസ, ജി.ഐ.ഒ ജില്ല പ്രസിഡന്റ് വി.മുഫീദ എന്നിവർ സംസാരിച്ചു. ജമാഅത്തെ ഇസ് ലാമി ജില്ല പ്രസിഡന്റ് അബ്ദുൽ ഹകീം നദ് വി സമാപനം നിർവഹിച്ചു. എസ്.ഐ.ഒ ജില്ല പ്രസിഡന്റ് ഫാസിൽ ആലത്തൂർ സ്വാഗതവും പ്രോ ഗ്രാം കൺവീനർ കെ.എം ഷാക്കിർ അഹമ്മദ് നന്ദിയും പറഞ്ഞു. ലുക്മാൻ ആലത്തൂർ, ഷാജഹാൻ കൊല്ലങ്കോട്, ജംഷീർ ആലത്തൂർ, നൗഷാദ് ആലവി, ഫാരിസ് വല്ലപ്പുഴ, അനീസ് തിരുവിഴംകുന്നു, ഷഫീഖ് അജ്മൽ, റഫീക് പുതുപ്പള്ളിത്തെരുവ്, ഷാഹിൻ ആലത്തൂർ, സി.എം.റഫീഅ, എന്നിവർ നേതൃത്വം നൽകി. ഹാദിയയുടെ ജീവൻ സംരക്ഷിക്കാൻ സർക്കാർ അടിയന്തിരമായി ഇടപെടണമെന്ന് ആവശ്യപ്പെട്ട് നേതാക്കൾ കലക്ടർക്ക് നിവേദനം സമർപ്പിച്ചു.