ഫിറോസ് കുന്നംപറമ്പിലിനെതിരെ വംശീയ അധിക്ഷേപം; മന്ത്രി കെ.ടി ജലീലിനെതിരെ പരാതിയുമായി യൂത്ത് കോൺ​ഗ്രസ്

മലപ്പുറം: തവനൂരിലെ യു.ഡി.എഫ് സ്ഥാനാർത്ഥി ഫിറോസ് കുന്നംപറമ്പിലിനെതിരെ എൽഡിഎഫ് സ്ഥാനാർത്ഥി കൂടിയായ മന്ത്രി കെ.ടി ജലീൽ വംശീയ അധിക്ഷേപം നടത്തിയതായി പരാതി. ഫിറോസ് കുന്നുംപറമ്പിൽ സങ്കരയിനമാണെന്ന് കെ.ടി ജലീൽ അധിക്ഷേപിച്ചെന്നാണ് പരാതി.

സംഭവത്തിൽ സംസ്ഥാന പൊലീസ്‌ മേധാവിക്കും തെരഞ്ഞെടുപ്പ്​ കമീഷനും യൂത്ത് കോൺഗ്രസ്​ സംസ്ഥാന ജനറൽ സെക്രട്ടറി ഇ.പി. രാജീവ് പരാതി നൽകി. ഒരു​ സ്വകാര്യ ചാനലിന്​ നൽകിയ അഭിമുഖത്തിലാണ്​ ഫിറോസ്​ കുന്നംപറമ്പിൽ സങ്കര വർഗത്തിൽ പെടുന്നയാളാണെന്ന്​ കെ.ടി. ജലീൽ ആക്ഷേപിച്ചതെന്ന്​​ പരാതിയിൽ പറയുന്നു. ഇത്തരം വംശീയമായ അധിക്ഷേപങ്ങൾ തെരഞ്ഞെടുപ്പ്​ ചട്ടങ്ങൾക്ക്​ വിരുദ്ധവും സമൂഹത്തിൽ ചേരിതിരിവുകൾ സൃഷ്​ടിക്കുന്നതുമാണെന്നും പരാതിയിൽ ചൂണ്ടിക്കാട്ടി. വിഡിയോയും പരാതിക്കൊപ്പം സമർപ്പിച്ചിട്ടുണ്ട്​.