തിരുവനന്തപുരത്ത് മരുന്നു മാറി കോവിഡ് വാക്‌സിൻ കുത്തിവെച്ച കുട്ടികൾക്ക് ആരോഗ്യ പ്രശ്‌നങ്ങളില്ല; രണ്ട് ദിവസം നിരീക്ഷണത്തിൽ തുടരും; കുട്ടികൾ സ്ഥലം മാറി എത്തിയതാണ് വാക്‌സിനേഷൻ മാറി പോകാൻ കാരണമെന്നാണ് ആശുപത്രി അധികൃതർ
തിരുവനന്തപുരം: തിരുവനന്തപുരത്ത് മരുന്നുമാറി കോവിഡ് വാക്‌സിൻ കുത്തിവെച്ച കുട്ടികൾക്ക് നിലവിൽ ആരോഗ്യപ്രശ്‌നങ്ങളില്ല. നിലവിൽ കുട്ടികളെ നിരീക്ഷണത്തിൽ പ്രവേശിപ്പിച്ചിരിക്കുകയാണ്. കുട്ടികൾ സ്ഥലം മാറി എത്തിയതാണ് വാക്‌സിനേഷൻ മാറി പോകാൻ കാരണമെന്നാണ് അധികൃതർ വ്യക്തമാക്കുന്നത്.
15 വയസിൽ നൽകേണ്ട വാക്‌സിന് പകരമാണ് കുട്ടികൾക്ക് കോവിഡ് വാക്‌സിനായ കോവിഷീൽഡ് നൽകിയത്. ആര്യനാട് സാമൂഹിക ആരോഗ്യ കേന്ദ്രത്തിലാണ് സംഭവം. 15-ാം വയസിൽ എടുക്കേണ്ട കുത്തിവെപ്പിന് വേണ്ടിയായിരുന്നു കുട്ടികൾ ആരോഗ്യ കേന്ദ്രത്തിൽ എത്തിയത്. കുത്തിവെപ്പ് എടുക്കുന്ന സ്ഥലം മാറി കോവിഡ് വാക്‌സിൻ എടുക്കുന്ന സ്ഥലത്തേക്കാണ് കുട്ടികൾ പോയതെന്നാണ് വിവരം. തുടർന്ന് രണ്ടുപേർക്കും കോവിഷീൽഡ് വാക്‌സിൻ കുത്തിവെക്കുകയായിരുന്നു.
കുട്ടികൾ വീട്ടിലെത്തി ഇക്കാര്യം രക്ഷിതാക്കളോട് പറഞ്ഞു. ശേഷം രക്ഷിതാക്കൾ ആശുപത്രിയിൽ എത്തി അന്വേഷിക്കുകയായിരുന്നു. തുടർന്ന് നടത്തിയ പരിശോധനയിൽ ഇവർക്ക് കോവിഡ് വാക്‌സിനാണ് കുത്തിവെച്ചതെന്ന് കണ്ടെത്തി.
