ഇടുക്കി: ജില്ലയുടെ വിവിധ ഭാഗങ്ങളിൽ കള്ളത്തോക്കുകൾ ഉപയോഗിക്കുന്നുണ്ടെന്ന് ജില്ലാ പൊലീസ് മേധാവി ആർ. കറുപ്പസാമിക്കു ലഭിച്ച വിവരത്തിന്റെ അടിസ്ഥാനത്തിൽ വ്യാപക റെയ്ഡ് നടത്തി. 63 ഇടങ്ങളിൽ റെയ്ഡ് നടത്തിയതിലൂടെ നിയമവിരുദ്ധമായി സൂക്ഷിച്ചിരുന്ന 5 നാടൻ തോക്കുകളും, രൂപമാറ്റം വരുത്തിയ 6 എയർ ഗണുകളും, 15 ജലാറ്റിൻ സ്റ്റിക്കുകളും കൂടാതെ ആനയുടെ തേറ്റ, മാൻകൊമ്പ് മുതലായവയും പിടിച്ചെടുത്തു. 11 കേസുകൾ രജിസ്റ്റർ ചെയ്തതു. നാലു പേരെ അറസ്റ്റ് ചെയ്തു.

നാടൻതോക്ക് സൂക്ഷിച്ചതിന് കഞ്ഞിക്കുഴി മക്കുവള്ളി വാഴപ്പനാൽ വീട്ടിൽ കുഞ്ഞേപ്പ് (62), വെണ്മണി ഈഴമറ്റത്തിൽ ബേബി (54) എന്നിവരെയും, നാടൻ തോക്കും പിടിയാനയുടെ തേറ്റയും സൂക്ഷിച്ചതിന് ദേവികുളം ചിലന്തിയാർ ലക്ഷ്മണൻ (46)നെയും ജലാറ്റിൻ സ്റ്റിക്ക് കൈവശം സൂക്ഷിച്ചതിന് മുരിക്കാശ്ശേരി ജോസ് പുരത്ത് മൂക്കനാലിൽ സജി (50) എന്നിവരെയാണ് അറസ്റ്റ് ചെയ്തത് . കൂടാതെ നാടൻ തോക്കിന്റെ അനുബന്ധ ഭാഗങ്ങൾ കണ്ടെടുത്ത സംഭവത്തിൽ കുടയത്തൂർ അടൂർ മല ഭാഗത്ത് ഒറ്റപ്ലാക്കൽ വീട്ടിൽ സുകുമാരൻ (64) , നാടൻ തോക്കിന്റെ അനുബന്ധ ഭാഗങ്ങളും മാൻകൊമ്പും സൂക്ഷിച്ചതിന് മൂന്നാർ താളുംകണ്ടം ട്രൈബൽ സെറ്റിൽമെന്റിൽ രഘു (35) എന്നിവർക്കെതിരേ കേസ് എടുത്തു.

രൂപമാറ്റം വരുത്തിയ എയർഗൺ, എയർപിസ്റ്റൾ എന്നിവ കൈവശം വച്ചതിനു കുമളി പൊലീസ് സ്റ്റേഷനിൽ മൂന്നും മുട്ടം, കരിംകുന്നം പൊലീസ് സ്റ്റേഷനുകളിൽ ഓരോ കേസ് വീതവും രജിസ്റ്റർ ചെയ്തിട്ടുണ്ട്. പിടിച്ചെടുത്ത ആനത്തേറ്റയും മാൻകൊമ്പും വനം വകുപ്പിന് കൈമാറി.

അഡീഷണൽ ജില്ലാ പൊലീസ് സൂപ്രണ്ട് എസ്. സുരേഷ് കുമാർ, ജില്ലാ സ്‌പെഷ്യൽ ബ്രാഞ്ച് ഡിവൈഎസ്‌പി നിഷാദ് മോൻ വി.എ, ഡിവൈഎസ്‌പി മാരായ സന്തോഷ് കുമാർ ജെ , ലാൽജി കെ, കെ.എഫ് ഫ്രാൻസിസ് ഷെൽബി , സുരേഷ് ആർ, രാജപ്പൻ ടി എന്നിവരുടെ നേതൃത്വത്തിൽ നടത്തിയ റെയ്ഡിൽ വിവിധ പൊലീസ് സ്റ്റേഷനുകളിലെ ഉദ്യോഗസ്ഥർ പങ്കെടുത്തു.

ഇടുക്കിയിൽ കള്ളത്തോക്കുകൾ പിടികൂടി

പ്രകാശ് ചന്ദ്രശേഖര്‍

    മറുനാടന്‍ മലയാളി ലേഖകന്‍.