കോതമംഗലം: എടിഎം കവർച്ച ഉൾപ്പെടെ നിരവധി മോഷണ കേസിലെ പ്രതികൾ പൊലീസ് പിടിയിൽ. നെല്ലിക്കുഴിയിലെ എസ്.ബി.ഐ എടിഎം കവർച്ച ചെയ്യുകയും പരിസരപ്രദേശങ്ങളിൽ മോഷണ പരമ്പര നടത്തുകയും ചെയ്ത ഉത്തർപ്രദേശ് സ്വദേശികളായ മുഹസിൻ (29), ഷഹജാദ് (20), നദീം (26) ഷംസാദ് (21) എന്നിവരെയാണ് കോതമംഗലം പൊലീസ് അറസ്റ്റ് ചെയ്തിട്ടുള്ളത്.

പുതിയ മോഷണ പദ്ധതികൾ ആസൂത്രണം ചെയ്യുന്നതിനിടെയാണ് പ്രതികൾ പിടിയിലാകുന്നത്. ഷഹജാദിന്റെ നേതൃത്വത്തിലുള്ള സംഘമാണ് നെല്ലിക്കുഴി ഭാഗത്ത് മോഷണ പരമ്പര നടത്തിയത്. ഇവിടെ നടന്ന മോഷണ കേസുകളിൽ അന്വേഷണം ഊർജ്ജിതമാക്കാൻ ജില്ലാ പൊലീസ് മേധാവി കെ.കാർത്തിക്കിന്റെ നേതൃത്വത്തിൽ പ്രത്യേക അന്വേഷണ സംഘം രൂപീകരിച്ചിരുന്നു.

മൂവാറ്റുപുഴ ഡി.വൈ.എസ്‌പി മുഹമ്മദ് റിയാസ്,കോതമംഗലം പൊലീസ് സബ് ഇൻസ്പെക്ടർ വിപിൻ.വി എസ്സ്, സബ് ഇൻസ്പെക്ടർമാരായ മാഹിൻ, സലിം, ഇ.പി.ജോയ്, ലിബു തോമസ്സ്, എഎസ്ഐ ബിനു വർഗീസ്, എസ്.സി.പി.ഒ മാരായ ശ്രീജിത്ത്, ജിതേഷ്, സുനിൽ മാത്യു,സി.പി.ഒ മാരായ അനൂപ്, ഷിയാസ്.എം.കെ എന്നിവരാണ് മറ്റ് അന്വേഷണ സംഘത്തിലുണ്ടായിരുന്നത്. മോഷണ കേസുകളിൽ അന്വേഷണം വ്യപിപ്പിച്ചിട്ടുണ്ടെന്നും കൂടുതൽ പ്രതികൾ ഉടൻ പിടിയിലാകുമെന്നും ജില്ലാ പൊലീസ് മേധാവി കെ.കാർത്തിക്ക് അറിയിച്ചു.

കോതമംഗലം എടിഎം കവർച്ച

പ്രകാശ് ചന്ദ്രശേഖര്‍

    മറുനാടന്‍ മലയാളി ലേഖകന്‍.