തലശേരിയിൽ കഞ്ചാവുമായി പിടിയിലായ യുവാവ് എക്‌സൈസിനെ കുത്തി പരുക്കേൽപ്പിച്ച് രക്ഷപ്പെട്ടു; രണ്ടുപേർക്ക് പരിക്ക്

 തലശേരി:കഞ്ചാവു പൊതിയുമായി പിടിയിലായ പ്രതി എക്സൈസ് സംഘത്തെ അക്രമിച്ചു രക്ഷപ്പെട്ടു. പ്രിവന്റിവ് ഓഫിസർ കെ.സി ഷിബു, സിവിൽ എക്സൈസ് ഓഫിസർ ജിജീഷ് ചെറുവായി എന്നിവരെ വാഹനത്തിന്റെ ഗ്ലാസ് കൊണ്ട് കുത്തി പരിക്കേൽപ്പിക്കുകയും കല്ല് കൊണ്ട് തലയ്ക്ക് കുത്തിയ ശേഷം തള്ളിയിട്ട് പ്രതി കഞ്ചാവ് പൊതി ഉപേക്ഷിച്ച് രക്ഷപ്പെടുകയായിരുന്നു.

തിരുവങ്ങാട് ചാലിൽ ചാക്കിരി ഹൗസിൽ കെ.എൻ നസീർ(37)ആണ് എക്സൈസ് സംഘത്തെ അക്രമിച്ച് രക്ഷപ്പെട്ടത്. പരിക്കേറ്റ ഉദ്യോഗസ്ഥർ ആശുപത്രിയിൽ ചികിത്സ തേടി. പ്രതി ഉപേക്ഷിച്ചുപോയ 25ഗ്രാം കഞ്ചാവ് അധികൃതർ കസ്റ്റഡിയിലെടുത്തു.

സംഭവത്തിൽ റേഞ്ച് എക്സൈസ് ഇൻസ്പെക്ടർ കെ.പി ഹരീഷ് കുമാർ തലശേരി പൊലീസിൽ പരാതി നൽകി. എക്സൈസ് ഉദ്യോഗസ്ഥരെ ആക്രമിക്കുകയും കൃത്യനിർവഹണം തടസപ്പെടുത്തിയതിനും പ്രതിക്കെതിരേ പൊലീസ് ജാമ്യമില്ലാ വകുപ്പുകൾ പ്രകാരം കേസെടുത്തിട്ടുണ്ട്.