മലപ്പുറം: മൂന്ന് കേസുകളിലായി കോടതി പിടികിട്ടാപ്പുള്ളിയായി പ്രഖ്യാപിച്ച മലപ്പുറം ഉണ്യാലിലെ വാറണ്ട് പ്രതി അറസ്റ്റിൽ. ഉണ്ണിയാൽ സ്വദേശി മരക്കാരകത്ത് മജീദിന്റെ മകൻ മിർഷാദാണ് (28) പൊലീസ് പിടിയിലായത്. ഒരുമാസത്തെ നിരീക്ഷണത്തിനൊടുവിലാണ് അറസ്റ്റ്. 2016 മുതൽ ഇയാൾ നിരവധി രാഷ്ട്രീയ സംഘർഷങ്ങളിൽ പ്രതിയാണ്. ഗൾഫിലേക്ക് മുങ്ങിയ ഇയാൾ ഈ ഈയടുത്താണ് നാട്ടിലെത്തിയത്.

നാട്ടിലെത്തിയ ശേഷവും 2017 മെയ് 5ന് ഓട്ടോറിക്ഷ തടഞ്ഞുനിർത്തി യാത്രക്കാരനെ കൊല്ലണമെന്ന ഉദ്ദേശത്തോടെ വെട്ടിപ്പരിക്കേല്പിച്ച കേസിലാണ് ഇയാളെ ഇന്നലെ ഉണ്യാലിൽ നിന്നും അറസ്റ്റ് ചെയ്തത്. ഇരുമ്പ് പൈപ്പ്, വാൾ എന്നിവ കൊണ്ട് സിദ്ധീഖ് എന്ന യാത്രക്കാരനെ മാരകമായി വെട്ടിപ്പരിക്കേല്പിക്കുകയായിരുന്നു.

വർഷങ്ങളായി കോടതിയിൽ ഹാജരാകാതെ ഒളിവിൽ കഴിയുകയായിരുന്ന ഇയാളെ താനൂർ പൊലീസാണ് അറസ്റ്റ് ചെയ്തത്. കോടതിയിൽ ഹാജരാകാത്തതിനെ തുടർന്ന് കോടതി പിടികിട്ടാ പുള്ളിയായി പ്രഖ്യാപിക്കുകയായിരുന്നു. മറ്റു രണ്ടു കൊലപാതക കേസുകളിലും പ്രതിയെ കോടതി പിടികിട്ടാ പുള്ളിയായി പ്രഖ്യാപിച്ചിട്ടുള്ളതാണ്.

താനൂർ ഡി വൈ എസ് പി മൂസ വള്ളിക്കാടന്റെ നേതൃത്വത്തിൽ താനൂർ ഇൻസ്പെകർ ജീവൻ ജോർജ്, താനൂർ പരപ്പനങ്ങാടി ഇൻസ്പെക്ടർ ഹണി കെ ദാസിന്റെയും മേൽനോട്ടത്തിൽ പ്രവർത്തിക്കുന്ന 5 അംഗ സ്‌ക്വോഡിലെ അംഗങ്ങളായ സബറുദ്ദീൻ, അനീഷ്, ആൽബിൻ, വിപിൻ, ജിനീഷ്, , അഭിമന്യു എന്നിവർ ചേർന്നാണ് പ്രതിയെ പിടികൂടിയത്. പ്രതിയെ പരപ്പനങ്ങാടി കോടതിയിൽ ഹാജരാക്കി. പ്രതിയെ റിമാൻഡ് ചെയ്തു.

താനൂർ ഡി വൈ എസ് പിയുടെ കീഴിയുള്ള പൊലീസ് സ്റ്റേഷനുകളിൽ ഇത്തരത്തിൽ കോടതി പിടികിട്ടാപ്പുള്ളിയായി പ്രഖ്യാപിച്ച പ്രതികളെ പിടികൂടി നിയമത്തിന് മുന്നിൽ കൊണ്ടുവരുന്നതിന് വ്യാപകമായ അന്വേഷണം നടന്നുവരുന്നുണ്ടെന്ന് അന്വേഷണ സംഘം അറിയിച്ചു. വിദേശത്ത് ഒളിവിൽ കഴിയുന്ന പ്രതികളെ പിടികൂടുന്നതിനും വിവരങ്ങൾ ശേഖരിച്ച് വരികയാണ്.

പിടികിട്ടാപ്പുള്ളി

ജംഷാദ് മലപ്പുറം

    മറുനാടന്‍ മലയാളി ന്യൂസ് കോണ്‍ട്രിബ്യൂട്ടര്‍