ആലുവ: മോഷ്ടിച്ച ബൈക്കിൽ കറങ്ങി നടന്ന മൂന്ന് കൗമാരക്കാർ പിടിയിൽ. രണ്ട് പതിനാറ്കാരേയും, ഒരുപതിനാലു വയസുള്ള ആളേയുമാണ് ആലുവ പൊലീസ് പിടികൂടിയത്. കഴിഞ്ഞ ഇരുപതിനാണ് റയിൽവേ സ്റ്റേഷൻ പരിസരത്ത് നിന്നും ചേന്ദമംഗലം സ്വദേശി അനുഭാസിയുടെ ബൈക്ക് മോഷ്ടിച്ചത്. പതിനാറ് വയസുള്ള രണ്ടു പേർ ചേർന്ന് ബൈക്ക് തള്ളിക്കൊണ്ടുപോയി വർക്ക് ഷോപ്പിൽ എത്തിക്കുകയായിരുന്നു.

വർക്ക് ഷോപ്പ് മെക്കാനിക്കായ പതിനാല്കാരൻ നമ്പർ പ്ലേറ്റ് തിരുത്തുകയും പുതിയ കീസെറ്റ് സ്ഥാപിച്ച് ബൈക്കിന് രൂപ മാറ്റം വരുത്തുകയും ചെയ്തു. തുടർന്ന് ബൈക്ക് ഉപയോഗിച്ച് കൊണ്ടിരിക്കുകയുമായിരുന്നു. മോഷ്ടാക്കളെ പിടികൂടുന്നതിന് ജില്ലാ പൊലീസ് മേധാവി കെ.കാർത്തിക്കിന്റെ നിർദ്ദേശാനുസരണം പ്രത്യേക ടീം രൂപീകരിച്ച് അന്വേഷണം നടത്തുന്നതിനിടയിലാണ് കൗമാരക്കാർ പിടിയിലാകുന്നത്. അമിത വേഗതയിലാണ് ഇവർ വാഹനം ഓടിച്ചുകൊണ്ടിരുന്നത്. അന്വേഷണ സംഘത്തിൽ എസ്.എച്ച്.ഒ എൽ.അനിൽകുമാർ, എസ്‌ഐ.മാരായ എം.എസ്.ഷെറി, കെ.ജോണി, സി.പി.ഒ.മാരായ മുഹമ്മദ് അമീർ, മാഹിൻ ഷാ അബൂബക്കർ, എച്ച്.ഹാരിസ് എന്നിവരാണ് ഉള്ളത്.