കോതമംഗലത്ത് ഓട്ടോയിൽ കടത്തിയ കഞ്ചാവ് പിടികൂടി; പന്ത്രണ്ടര കിലോ പിടികൂടിയത് നെല്ലിമറ്റത്ത് വാഹന പരിശോധനയ്ക്കിടെ

കോതമംഗലം: ഓട്ടോയിൽ കടത്തുകയായിരുന്ന 12.435 കിലോ കഞ്ചാവ് എക്സൈസ് സംഘം പിടികൂടി. എക്സൈസ് സർക്കിൾ ഇൻസ്പെക്ടർ ജോസ് പ്രതാപിന്റെ നേതൃത്വത്തിലുള്ള സംഘം നെല്ലിമറ്റത്തിനടുത്ത് വാഹന പരിശോധനക്കിടെ സംശയം തോന്നി ഓട്ടോറിക്ഷ പരിശോധിക്കുകയായിരുന്നു.

സംഭവവുമായി ബന്ധപ്പെട്ട് തൃശൂർ കൊടുങ്ങല്ലൂർ തുരുത്തി വീട്ടിൽ അജിത്തി(33)നെ അറസ്റ്റുചെയിട്ടുണ്ടെന്നും ഇയാൾക്ക് കഞ്ചാവ് വിൽപ്പന നടത്തിയ നെല്ലിമറ്റം സ്വദേശിയെക്കുറിച്ച് വ്യക്തമായ വിവരം ലഭിച്ചിട്ടുണ്ടെന്നും സി ഐ അറിയിച്ചു. കിലോക്ക് 10000 രൂപ നിരക്കിൽ നെല്ലിമറ്റം സ്വദേശിയിൽ നിന്നും 6 തവണ കഞ്ചാവ് വാങ്ങിയതായി ചോദ്യം ചെയ്യലിൽ അജിത്ത് സമ്മതിച്ചിട്ടുണ്ട്.

പ്രിവന്റീവ് ഓഫിസർ കെ എ നിയാസ് , ഗ്രേഡ് പ്രിവെന്റീവ് ഓഫിസർ സിദ്ദിഖ് എ ഇ , സിവിൽ എക്സൈസ് ഓഫിസർമാരായ ഉമ്മർ പി ഇ, ബിജു പി വി, സുനിൽ പി എസ്, അനൂപ് ടി കെ , ബേസിൽ കെ തോമസ്, ഡ്രൈവർ ബിജു പോൾ എന്നിവരും റെയ്ഡിൽ പങ്കെടുത്തു.