രാജാക്കാട്: സേനാപതി മാവറസിറ്റിയിൽ ജേഷ്ഠനെ എയർഗൺ കൊണ്ട് വെടി വച്ച ശേഷം ഒളിവിൽ പോയ പ്രതിയെ ഉടുമ്പൻചോല പൊലീസ് അറസ്റ്റ് ചെയ്തു. മാവറസിറ്റി കൂനംമാക്കൽ സാന്റോ(38) യെ തൃശൂർ മാടക്കത്തറയിലെ സുഹൃത്തിന്റെ വീട്ടിൽ നിന്നാണ് ഇന്നലെ വൈകിട്ട് ഉടുമ്പൻചോല എസ്എച്ച്ഒ ഫിലിപ് സാമിന്റെ നേതൃത്വത്തിലുള്ള അന്വേഷണ സംഘം അറസ്റ്റ് ചെയ്തത്.

വ്യാഴാഴ്ച വൈകിട്ട് വാക്ക് തർക്കത്തെ തുടർന്ന് സഹോദരൻ സിബി(49) യുടെ കഴുത്തിൽ എയർഗൺ കൊണ്ട് വെടി വച്ച് ശേഷം ഒളിവിൽ പോയ സാന്റോ വെള്ളിയാഴ്ച രാവിലെ മൂവാറ്റുപുഴയിലുള്ള സുഹൃത്തിന്റെ വീട്ടിലെത്തി. ഇന്നലെ രാവിലെ അവിടെ നിന്ന് തൃശൂർ മാടക്കത്തറയിലെ മറ്റൊരു സുഹൃത്തിന്റെ വീട്ടിലേക്ക് പോയി. ഫോൺ ഓഫാക്കി വച്ച ശേഷമായിരുന്നു നാടുവിടാനുള്ള ശ്രമം.

വാഹനത്തിന്റെ നമ്പർ സിസിടിവിയിലൂടെ പിന്തുടർന്ന പൊലീസ് ഇയാളെ പിടികൂടുകയായിരുന്നു. സംസ്ഥാനം വിടാനുള്ള ശ്രമത്തിനിടെയാണ് സാന്റോയെ പൊലീസ് പിടികൂടിയത്. ഇയാളെ ഇന്നലെ രാത്രി 10 മണിയോടെയാണ് ഉടുമ്പൻചോലയിലെ സ്റ്റേഷനിലെത്തിച്ചത്. തെളിവെടുപ്പിന് ശേഷം  കോടതിയിൽ ഹാജരാക്കും

 

പ്രകാശ് ചന്ദ്രശേഖര്‍

    മറുനാടന്‍ മലയാളി ലേഖകന്‍.