ചേർപ്പിൽ മദ്യപിച്ച് വഴക്കുണ്ടാക്കിയ ചേട്ടനെ അനിയൻ കുഴിച്ചുമൂടിയത് ജീവനോടെ; ബാബുവിന്റെ ശ്വാസകോശത്തിൽ മണ്ണിന്റെ സാന്നിധ്യം; ഒട്ടും കൂസലില്ലാതെ സാബു; വീട്ടിലെ ടിവി തകർന്ന നിലയിൽ കണ്ടതും കേസിൽ നിർണായകമായി
തൃശൂർ: ചേർപ്പിൽ മദ്യപിച്ച് എത്തി വഴക്കുണ്ടാക്കിയ ചേട്ടനെ അനുജൻ കുഴിച്ചുമൂടിയത് ജീവനോടെ. നിർണായക വിവരങ്ങൾ ലഭ്യമായത് പോസ്റ്റ്‌മോർട്ടം റിപ്പോർട്ട് പുറത്തുവന്നതോടെയാണ്. ബാബുവിനെ കഴുത്ത് ഞെരിച്ച് കൊന്നെന്നായിരുന്നു അനിയൻ സാബുവിന്റെ മൊഴി. പോസ്റ്റ്‌മോർട്ടത്തിൽ, ബാബുവിന്റെ ശ്വാസകോശത്തിൽ മണ്ണിന്റെ സാന്നിദ്ധ്യം കണ്ടെത്തി. തലയ്ക്ക് മുറിവേറ്റിട്ടുള്ളതായും കണ്ടെത്തിയിട്ടുണ്ട്.
മൃതദേഹമാണെന്ന് കരുതി ബാബുവിനെ വലിച്ചിഴച്ചു പോയപ്പോൾ തല എന്തിലെങ്കിലും തട്ടിയതാകാമെന്നാണ് പൊലീസ് കരുതുന്നത്. മാർച്ച് 16ന് രാത്രിയാണ് ബാബു കൊല്ലപ്പെട്ടത്. വീട്ടിൽ നിന്നും 300 മീറ്റർ അകലെയുള്ള കുറ്റിക്കാട്ടിലായിരുന്നു ബാബുവിനെ കുഴിച്ചിട്ടത്. കൊലയ്ക്ക് ശേഷം ഒൻപത് ദിവസവും സാബു സഹോദരനെ അന്വേഷിച്ചു.
കുറ്റിക്കാട്ടിൽ മൃതദേഹം കണ്ടെത്തിയതറിഞ്ഞ് പൊലീസ് പരിശോധന നടത്തുന്നതിനിടയിൽ ജനക്കൂട്ടത്തിനിടയിൽ യാതൊരു ഭാവവ്യത്യാസവുമില്ലാതെ സാബുവും ഉണ്ടായിരുന്നു. മാർച്ച് 22ന് പശുവിനെ തീറ്റാൻ പോയ നാട്ടുകാരനായ സുധാകരൻ ബണ്ടിലെ മണ്ണ് ഇളകി കിടക്കുന്നതും ഒരു ഭാഗം തെരുവു നായ്ക്കൾ ചേർന്ന് കുഴിക്കുന്നതും കണ്ടിരുന്നു. കഴിഞ്ഞ ദിവസം രാവിലെ ഇതേസ്ഥലത്ത് എത്തിയപ്പോൾ മണ്ണ് പഴയപടി തന്നെ കിടക്കുന്നത് കണ്ട് സംശയം തോന്നി നാട്ടുകാരെ വിവരമറിയിക്കുകയായിരുന്നു.
തുടർന്ന് കൈക്കോട്ട് കൊണ്ട് കുഴിച്ചു നോക്കിയപ്പോൾ സിമന്റ് കട്ട നിരത്തി വച്ചിരിക്കുന്നത് ശ്രദ്ധയിൽപ്പെടുകയായിരുന്നു. ദുർഗന്ധം വമിച്ചതോടെ പൊലീസിൽ വിവരമറിയിച്ചു. ഇതേത്തുടർന്ന് പൊലീസ് എത്തി പരിശോധന നടത്തിയപ്പോൾ മൃതദേഹത്തിന്റെ കൈയുടെ ഭാഗം കണ്ടെത്തുകയായിരുന്നു. ബാബുവിന്റെ കൈയിൽ പച്ചകുത്തിയിരുന്നതും നിർണായകമായി.
നാട്ടുകാർ തിരച്ചിൽ നടത്തുമ്പോൾ സാബു വീട്ടിലുണ്ടായിരുന്നു. എന്നാൽ വീട്ടിൽ ഇല്ല എന്നായിരുന്നു പൊലീസ് വിളിച്ചപ്പോൾ സാബു പറഞ്ഞത്. വീതി കുറഞ്ഞ കുഴിയെടുത്ത് ചരിച്ചായിരുന്നു മൃതദേഹം കിടത്തിയിരുന്നത്. ഇതിന് മുകളിൽ കുമ്മായവും ബ്‌ളീച്ചിങ് പൗഡറും വിതറിയിരുന്നു. ഇരുവരുടെയും വീട്ടിലെ ടിവി തകർന്ന നിലയിൽ കാണപ്പെട്ടതും പൊലീസിന് സംശയം തോന്നാൻ കാരണമായി.
സംഭവത്തിന് ദൃക്സാക്ഷിയാണെങ്കിലും പുറത്തുപറയാതെ മൂടിവച്ച അമ്മ പത്മാവതിയെ (52) കസ്റ്റഡിയിലെടുത്തെങ്കിലും ആരോഗ്യ സംബന്ധമായ കാരണങ്ങളാൽ തൃശൂർ ജില്ലാ ആശുപത്രിയിൽ പ്രവേശിപ്പിച്ചിരിക്കുകയാണ്. മൃതദേഹം കൊണ്ടുപോകാനും കുഴിച്ചിടാനും ആരുടെയെങ്കിലും സഹായം ലഭിച്ചിരുന്നോ എന്നതിനെക്കുറിച്ച് അന്വേഷിക്കുകയാണെന്ന് പൊലീസ് അറിയിച്ചു.
മുത്തുള്ളിയാൽ തോപ്പിൽ കൊട്ടേക്കാട്ടുപറമ്പിൽ പരേതനായ ജോയിയുടെ മകൻ ബാബുവിനെ (27) കഴുത്തുഞെരിച്ചു കൊലപ്പെടുത്തിയ കേസിൽ അനുജൻ സാബുവാണ് (25) അറസ്റ്റിലായത്. കഴിഞ്ഞ 16നായിരുന്നു സംഭവം. ബാബുവിന്റെ അസാന്നിധ്യത്തെക്കുറിച്ചു ചോദ്യങ്ങൾ ഉയർന്നപ്പോൾ 'പണിക്കു പോയതായിരിക്കും' എന്ന മറുപടിയുമായി പിടിച്ചുനിൽക്കാൻ സാബു ആദ്യദിവസങ്ങളിൽ ശ്രമിച്ചിരുന്നു. എന്നാൽ, മൃതദേഹം മറവു ചെയ്ത കുഴി അയൽവാസിയുടെ ശ്രദ്ധയിൽ പെട്ടതോടെ കുടുങ്ങി.
മദ്യപിച്ചു ബഹളമുണ്ടാക്കിയ ചേട്ടനെ അനുജൻ സാബു കഴുത്തുഞെരിച്ചു കൊലപ്പെടുത്തിയെന്നായിരുന്നു പൊലീസിനു നൽകിയ മൊഴി. മൽപിടിത്തത്തിനിടെ പാടത്തേക്കു വീണപ്പോൾ ബാബുവിന്റെ തലയിൽ മുറിവേറ്റിരുന്നു. ഇതും പോസ്റ്റ്‌മോർട്ടത്തിൽ സ്ഥിരീകരിച്ചിട്ടുണ്ട്.
ബാബുവിനെ കാണാതായി നാല് ദിവസങ്ങൾക്ക് ശേഷമാണ് സഹോദരനായ സാബു തന്നെ വിവരമറിയിക്കുന്നതെന്ന് മുൻ പഞ്ചായത്ത് പ്രസിഡന്റ് സി കെ വിനോദ് പറഞ്ഞു. പരാതി നൽകാൻ നിർദ്ദേശിച്ചതിനെത്തുടർന്ന് ഉടൻ പൊലീസ് സ്റ്റേഷനിൽ എത്തി പരാതി നൽകുകയും ചെയ്തു. ഇടയ്ക്കിടെ സഹോദരനെക്കുറിച്ച് വിവരങ്ങൾ തേടുകയും നാല് തവണ ഇത് സംബന്ധിച്ച് പൊലീസ് സ്റ്റേഷനിൽ പോവുകയും ചെയ്തു. ഒരു സംശയവും ഇയാളെക്കുറിച്ച് തോന്നിയിരുന്നില്ലെന്നും പഞ്ചായത്ത് പ്രസിഡന്റ് പറഞ്ഞു.
