കുമളി: ഹൈസ്‌കൂൾ വിദ്യാർത്ഥിനിയെ ഉപദ്രവിക്കാൻ ശ്രമിച്ച കേസിൽ ആനവിലാസം ഹെവൻവാലി സ്വദേശി സ്റ്റാൽവിൻ(22) പിടിയിൽ. സ്‌കൂളിലേക്ക് പോകുകയായിരുന്ന വിദ്യാർത്ഥിനിയെ ബൈക്കിലെത്തിയ യുവാവ് കടന്നു പിടിക്കാൻ ശ്രമിക്കുകയായിരുന്നു.
തിങ്കളാഴ്ചയായിരുന്നു കേസിനാസ്പദമായ സംഭവം.

വിദ്യാർത്ഥി സ്‌കൂളിലേക്ക് പോകുന്നതിനിടെ ഇയാൾ ബൈക്കിലെത്തി ശരീരത്തിൽ കടന്നു പിടിക്കാൻ ശ്രമിക്കുകയായിരുന്നു. പെൺകുട്ടി ബഹളം വെച്ചതോടെ യുവാവ് രക്ഷപ്പെട്ടു. കുട്ടി രക്ഷിതാക്കളോട് കാര്യം പറഞ്ഞതോടെ കുമളി പൊലീസ് സ്റ്റേഷനിലെത്തി പരാതി നൽകുകയായിരുന്നു.

പരിസര പ്രദേശങ്ങളിലെ സിസിടിവി. പരിശോധിച്ചതിൽ നിന്നും യുവാവ് ഉപയോഗിച്ച ബൈക്ക് കണ്ടെത്തി. തുടർന്ന് ടൗൺ പരിസത്തെ സിസിടിവിയിൽ നിന്നും ഇയാളുടെ മുഖം ഉൾപ്പടെയുള്ള ദൃശ്യങ്ങൾ കണ്ടെത്തി. തിങ്കളാഴ്ച രാത്രി തന്നെ കുമളി സിഐ ജോബിൻ ആന്റണിയുടെ നേതൃത്വത്തിലുള്ള പൊലീസ് സംഘം പ്രതിയെ പിടികൂടി.

ചോദ്യം ചെയ്യലിൽ പ്രതി കുറ്റം സമ്മതിച്ചു. പോക്സോ നിയമ പ്രകാരമാണ് കേസെടുത്തിരിക്കുന്നത്. കോടതിയിൽ ഹാജരാക്കി റിമാൻഡ് ചെയ്തു.