ആലുവ : കന്നുകാലികളെ മോഷ്ടിച്ച അറവുശാലക്കാരൻ പിടിയിൽ. അശോകപുരം കൊടികുത്തുമല പുത്തൻപുരയിൽ ഷമീർ (37) ആണ് ആലുവ പൊലീസിന്റെ പിടിയിലായത്. ഇയാളും പ്രായപൂർത്തിയാകാത്ത ഒരു പയ്യനും ചേർന്നാണ് കന്നുകാലികളെ മോഷ്ടിച്ചത്.

ആലുവ കളമശേരി ഭാഗങ്ങളിൽ നിന്നും എട്ട് കന്നുകാലികളെ മോഷ്ടിച്ച ഇയാൾ അഞ്ചെണ്ണത്തിനെ കശാപ്പ് ചെയ്ത് വിൽപ്പന നടത്തി. പകൽ കന്നുകാലികളെ കണ്ടു വച്ച് രാത്രി ഒരു മണിയോടെ ഷമീറിന്റെ ഓട്ടോറിക്ഷയിൽ കൊണ്ടുപോവുകയാണ് പതിവ്. പുലർച്ചെ തന്നെ കശാപ്പ് ചെയ്യും.

പുതിയ മോഷണത്തിന് തയ്യാറെടുക്കുമ്പോഴാണ് പ്രതി പിടിയിലാകുന്നത്. ഇൻസ്‌പെക്ടർ എൽ. അനിൽകുമാർ, എസ്‌ഐ എം.എസ്.ഷെറി, സി.പി.ഒമാരായ മാഹിൻ ഷാ അബൂബക്കർ, മുഹമ്മദ് അമീർ, എ.എം.ഷാനിഫ് തുടങ്ങിയവരാണ് അന്വേഷണ സംഘത്തിലുണ്ടായിരുന്നത്.