മലപ്പുറം: അസംകാരിയായ പതിനാറുകാരിയെ ലൈംഗിക ചൂഷണത്തിനിരയാക്കിയ പ്രതികൾ പിടിയിൽ. അസം സ്വദേശിയായ സിറാജുൽ ഹഖ് എന്ന യുവാവും സുഹൃത്തുമാണ് മൊബൈൽ ഫോണിലൂടെ പരിചയപ്പെട്ട കുട്ടിയെ കേരളത്തിലെത്തിച്ചത്. വിവാഹിതനും മൂന്ന് കുട്ടികളുടെ അച്ഛനുമായ സിറാജുൽ ഹഖ് 23 വയസ്സുകാരനാണ്.

കുട്ടിയെ സ്നേഹം നടിച്ചു വിവാഹവാഗ്ദാനം നൽകി കൊണ്ടുവരികയായിരുന്നു. പിന്നീട് സുഹൃത്തിന്റെ സഹായത്തോടെ തിരുവനന്തപുരത്ത് എത്തിച്ചു ലൈംഗിക ചൂഷണത്തിനിരയാക്കിയതായി കുട്ടി മൊഴി നൽകി. ഇയാൾ വിവാഹിതനാണെന്ന് അറിഞ്ഞതോടെ താൻ കേരളത്തിലുണ്ടെന്ന് കുട്ടി വീട്ടുകാരെ അറിയിക്കുകയായിരുന്നു.

തുടർന്ന് കുട്ടിയുടെ ബന്ധുക്കളുടെ സഹായത്തോടെ കുട്ടിയേയും യുവാക്കളെയും തന്ത്രത്തിൽ മലപ്പുറം ജില്ലയിലെ തൂതയിലെത്തിക്കുകയായിരുന്നു. കുട്ടിയെ ചൈൽഡ്ലൈൻ ഏറ്റടുത്ത് ചൈൽഡ് വെൽഫെയർ കമ്മിറ്റി അംഗം അഡ്വ പി ജാബിർ മുൻബാകെ ഹാജരാക്കി. തുടർന്ന് കുട്ടിയെ സംരക്ഷണ കേന്ദ്രത്തിലേക്ക് മാറ്റി. പ്രതികളെ പൊലീസ് കസ്റ്റഡിയിലെടുത്തു.