മലപ്പുറം: പ്രണയത്തിൽ നിന്നും പിന്മാറിയ പ്രായപൂർത്തിയാവാത്ത പെൺകുട്ടിയെ കുത്തിക്കൊല്ലാൻ ശ്രമിച്ച 22കാരൻ അറസ്റ്റിൽ. പ്രണയം നിരസിച്ചു എന്ന കാരണത്താൽ പെൺകുട്ടിയെ കുത്തിക്കൊലപ്പെടുത്താൻ ശ്രമിച്ച സംഭവത്തിൽ മണ്ണാർമല പച്ചീരി വീട്ടിൽ ജിനേഷ്(22)നെയാണ് പെരിന്തൽമണ്ണ പൊലീസ് അറസ്റ്റുചെയ്തത്.

വ്യാഴാഴ്ച രാവിലെ എട്ടോടെ ആനമങ്ങാട് ടൗണിൽ ട്യൂഷൻ സെന്ററിന് സമീപത്തായിരുന്നു സംഭവം നടന്നത്. ബാഗിൽ കരുതിയ കത്തിയുമായെത്തിയ യുവാവ് പെൺകുട്ടിയെ തടഞ്ഞു നിർത്തി കുത്തിക്കൊല്ലാൻ ശ്രമിക്കുന്നതിനിടയിൽ പെൺകുട്ടി യുവാവിനെ തള്ളിയിട്ടതിനാൽ കുട്ടി പരിക്കേൽക്കാതെ രക്ഷപ്പെടുകയായിരുന്നു.

തുടർന്ന് പെൺകുട്ടി ബഹളം വെച്ചതോടെ ആളുകൾ ഓടിയെത്തുന്നതിനിടെ പ്രതി രക്ഷപ്പെടാൻ ശ്രമിക്കുകയും ഇതിനിടെ റോഡിലൂടെ വന്ന വാഹനം തട്ടി പ്രതി വീഴുകയും കൈക്ക് പരിക്കേൽക്കുകയും ചെയ്തു. നാട്ടുകാർ വിവരം അറിയിച്ചതിനെ തുടർന്ന് എത്തിയ പൊലീസ് പ്രതിയെ കസ്റ്റഡിയിലെടുത്തു.

തുടർന്ന് പെൺകുട്ടിയുടെ പരാതിയിൽ കൊലപാതകശ്രമത്തിനും പോക്‌സോ വകുപ്പുകളും പ്രകാരം കേസെടുത്ത് പ്രതിയുടെ അറസ്റ്റ് രേഖപ്പെടുത്തുകയായിരുന്നു. ഇരുവരും അടുപ്പത്തിലായിരുന്നുവെന്നും ഏപ്രിലിൽ ആനമങ്ങാടിനടുത്ത ബേക്കറിയിൽ വെച്ച് പ്രതി പെൺകുട്ടിയെ ചുംബിക്കാൻ ശ്രമിച്ചതോടെയാണ് പെൺകുട്ടി പ്രണയം നിരസിച്ചതെന്നും പൊലീസ് പറയുന്നു. ഇതിലുള്ള വിരോധത്താൽ പെൺകുട്ടിയെ കൊലപ്പെടുത്തണമെന്ന ഉദ്ദേശത്തോടെ പ്രതി എത്തുകയായിരുന്നുവെന്നും പൊലീസ് പറഞ്ഞു.

 

ജംഷാദ് മലപ്പുറം

    മറുനാടന്‍ മലയാളി ന്യൂസ് കോണ്‍ട്രിബ്യൂട്ടര്‍