ദലിത് വിദ്യാർത്ഥിയെ കൊണ്ട് കാല് നക്കിച്ചു; യുപിയിൽ വീണ്ടും ജാതി ക്രൂരത; വീഡിയോ സമൂഹമാധ്യമത്തിൽ വൈറലായതോടെ ഏഴുപേരെ അസ്റ്റ് ചെയ്ത് പൊലീസ്

റായ് ബറേലി: ഉത്തർപ്രദേശിലെ റായ് ബറേലിയിൽ ദലിത് വിഭാഗത്തിൽപ്പെട്ട വിദ്യാർത്ഥിക്ക് നേരെ ആക്രമണം. അക്രമികൾ കുട്ടിയെക്കൊണ്ട് കാല് നക്കിച്ചു. അക്രമത്തിന്റെ ഞെട്ടിക്കുന്ന വീഡിയോ സാമൂഹ്യ മാധ്യമങ്ങളിൽ വൈറലായി.

താക്കൂർ വിഭാഗത്തിൽപ്പെട്ട യുവാക്കളാണ് കുട്ടിയോട് അതിക്രമം കാണിച്ചത്. 'താക്കൂർ എന്ന പേര് പറയുമോ' എന്ന് ചോദിക്കുന്നത് വീഡിയോയിൽ കേൾക്കാം.

വീഡിയോ പുറത്തുവന്നതിന് പിന്നാലെ, ഏഴുപേരെ പൊലീസ് അറസ്റ്റ് ചെയ്തിട്ടുണ്ട്. ഏപ്രിൽ പത്തിനാണ് സംഭവം നടന്നത് എന്നാണ് പൊലീസ് വ്യക്തമാക്കുന്നത്. കുട്ടിയുടെ പരാതി ലഭിച്ചതിനെ തുടർന്നാണ് അന്വേഷണം ആരംഭിച്ചതെന്നും പൊലീസ് വ്യക്തമാക്കി.

വിധവയായ അമ്മയ്ക്കൊപ്പം താമസിക്കുന്ന പത്താംക്ലാസ് വിദ്യാർത്ഥിക്കാണ് കടുത്ത അതിക്രമം നേരിടേണ്ടിവന്നത്. പ്രതികളുടെ വയലിൽ ജോലി ചെയ്യുന്നയാളാണ് കുട്ടിയുടെ അമ്മ. ജോലി ചെയ്തതിന് പണം ചോദിച്ചതാണ് ഇവരെ പ്രകോപിപ്പിച്ചത്.