വെരി റവ.ഡോ.യോഹന്നാൻ ശങ്കരത്തിൽ കോർ എപ്പിസ്‌കോപ്പ ന്യുയോർക്കിൽ നിര്യാതനായി
അവിഭക്ത അമേരിക്കൻ ഭദ്രാസനത്തിലെ സീനിയർ വൈദികരിൽ പ്രമുഖനും, നോർത്ത് ഈസ്‌റ് അമേരിക്കൻ ഭദ്രാസനത്തിലെ ലോങ് അയലന്റ് ലെവിറ്റ് ടൗൺ സെന്റ് തോമസ് മലങ്കര ഓർത്തോഡോക്‌സ് ഇടവകയുടെ സ്ഥാപക വികാരിയുമായ വെരി റവ. ഡോ. യോഹന്നാൻ ശങ്കരത്തിൽ കോർ എപ്പിസ്‌കോപ്പ (85) ഇന്ന് (ശനിയാഴ്ച രാത്രി 8.50 ന്യുയോർക്കിൽ നിര്യാതനായി. കഴിഞ്ഞ ഏതാനും മാസങ്ങളായി വാർധക്യസഹജമായ അസുഖം മൂലം ഹോസ്പിറ്റലിൽ ചികിത്സയിലായിരുന്നു.
പ്രാരംഭ സംസ്‌കാര ശുശ്രൂഷകൾ ന്യുയോർക്ക് ലോങ് അയലന്റ് ലെവിറ്റ് ടൗൺ സെന്റ് തോമസ് മലങ്കര ഓർത്തോഡോക്‌സ് ദേവാലയത്തിൽ നോർത്ത് ഈസ്‌ററ് അമേരിക്കൻ ഭദ്രാസന മെത്രാപൊലീത്ത അഭിവന്ദ്യ സഖറിയാസ് മാർ നിക്കോളവാസ് മെത്രാപ്പൊലീത്തയുടെ പ്രധാന കാർമികത്വത്തിൽ നടക്കും. തുടർന്ന് മാതൃഇടവകയായ കുമ്പഴ സെന്റ് മേരീസ് ഓർത്തോഡോക്‌സ് കത്തീണ്ട്രൽ ദേവാലയത്തിൽ പിന്നീട് നടക്കും.
മധ്യ തിരുവിതാംകൂറിലെ പൗരോഹിത്യ പാരമ്പര്യമുള്ള പുരാതന പ്രസിദ്ധമായ ശങ്കരത്തിൽ കുടുംബത്തിൽ കുഞ്ഞുമ്മൻ മത്തായിയുടെയും ഏലിയാമ്മയുടെയും ഇളയപുത്രനായി 1936 മാർച്ച് ഒന്നിന് പത്തനംതിട്ട ജില്ലയിലെ കുമ്പഴയിൽ ജനിച്ച കുഞ്ഞൂഞ്ഞുകുട്ടി ചരിത്രനിയോഗംപോലെ 1970 സെപ്റ്റംബർ 12 -ന് ഉപരിപഠനത്തിനായി അമേരിക്കയിൽ എത്തി. പിന്നീട് ശങ്കരത്തിലച്ചൻ നടന്നുപോയ വഴികളിലെല്ലാം ദൈവാനുഗ്രഹത്തിന്റെ നേർവെളിച്ചം നിറഞ്ഞതായിരുന്നു. നാലു സഹോദരന്മാരിൽ കുഞ്ഞനുജനായിരുന്നു കുഞ്ഞൂഞ്ഞുകുട്ടി. മൂന്നര വയസ്സിൽ മാതാവിന്റെ ദേഹവിയോഗം. മൂന്നു ജ്യേഷ്ഠസഹോദരന്മാരും പിതാവും കൂടി ഈ ബാലനെ വളർത്തുന്ന ചുമതല ഏറ്റെടുത്തു. ഇരുപത്തേഴാമത്തെ വയസ്സിൽ പിതാവിന്റെ ദേഹവിയോഗം.
പുത്തൻകാവിൽ മാർ പീലക്സിനോസ് മെത്രാപ്പൊലീത്തായുടെ അനുഗ്രഹത്തോടുകൂടി 12-ാം വയസ്സിൽ വിശുദ്ധ മദ്ബഹായിലെ ശുശ്രൂഷയിൽ പ്രവേശിച്ചു. പരിശുദ്ധ ബസേലിയോസ് ഗീവർഗീസ് ദ്വിതീയൻ കാതോലിക്കാ ബാവാ 1953 ഓഗസ്റ്റ് 29-ന് 17-ാം വയസ്സിൽ ശെമ്മാശുപട്ടം (കോറൂയോ) നൽകി. 1957 ഡിസംബർ എട്ടിന് ഔഗേൻ മാർ തിമോത്തിയോസ് മെത്രാപ്പൊലീത്തായിൽ നിന്ന് യവ്പ്പദിയക്നോ പട്ടവും, 1970 ഓഗസ്റ്റ് 16-ന് യൂഹാനോൻ മാർ സേവേറിയോസ് മെത്രാപ്പൊലീത്തായിൽ നിന്ന് പൂർണ്ണ ശെമ്മാശുപട്ടവും സ്വീകരിച്ചു. അഭിവന്ദ്യ ഔഗേൻ മെത്രാപ്പൊലീത്തായോടൊപ്പം താമസിച്ച് സുറിയാനി പഠനവും വേദശാസ്ത്ര പഠനവും ആരംഭിച്ചു. 1970 ഓഗസ്റ്റ് 21-ന് തുമ്പമൺ ഭദ്രാസനത്തിന്റെ ദാനിയേൽ മാർ പീലക്സിനോസ് മെത്രാപ്പൊലീത്താ വൈദികപട്ടം നൽകി. 1980 ഏപ്രിൽ 26-ന് പരിശുദ്ധ മാർത്തോമ്മാ മാത്യൂസ് പ്രഥമൻ കാതോലിക്കാബാവാ 44-ാം വയസ്സിൽ അമേരിക്കൻ ഭദ്രാസനത്തിന്റെ പ്രഥമ കോർ എപ്പിസ്‌ക്കോപ്പയായി സ്ഥാനാഭിഷേകം ചെയ്തു.ബസ്സേലിയോസ് ഔഗേൻ പ്രഥമൻ കാതോലിക്കാബാവായുടെ സെക്രട്ടറിയായും 'മലങ്കരസഭ' മാസികയുടെ എഡിറ്ററായും പ്രവർത്തിച്ചിട്ടുണ്ട്.
പത്തനംതിട്ട കാതോലിക്കേറ്റ് കോളേജിൽനിന്ന് ധനതത്വശാസ്ത്രത്തിൽ ബി.എ.യും മലയാളത്തിൽ എം.എ.യും ഡിഗ്രികൾ. കോട്ടയം ഓർത്തഡോക്സ് സെമിനാരിയിൽനിന്ന് ജി.എസ്.റ്റി. ബിരുദം, ന്യൂയോർക്കിൽ യൂണിയൻ തിയോളജിക്കൽ സെമിനാരിയിൽനിന്ന് വേദശാസ്ത്രത്തിൽ മാസ്റ്റർ ബിരുദവും (STM) എക്യുമെനിക്കൽ ഫെലോ ബഹുമതിയും അമേരിക്കൻ കൗൺസിൽ ഓഫ് പാസ്റ്ററൽ എഡ്യൂക്കേഷന്റെ കീഴിൽ രണ്ടുവർഷത്തെ ക്ലിനിക്കൽ പാസ്റ്ററൽ കൗൺസലിങ് അഭ്യസനം. ന്യൂയോർക്ക് ലോംഗ് ഐലൻഡ് യൂണിവേഴ്സിറ്റിയിൽനിന്ന് മാനസിക ചികിത്സാ ശാസ്ത്രത്തിലും കുടുംബ കൗൺസലിംഗിലും മാസ്റ്റർ ബിരുദം (MS). ന്യൂയോർക്ക് യൂണിവേഴ്സിറ്റിയിൽനിന്ന് എം.എ. ബിരുദം (തെറാപ്യൂട്ടിക് റെക്രിയേഷൻ) ഹോഫ്സ്ട്രാ യൂണിവേഴ്സിറ്റിയിൽനിന്ന് എം.എസ്. ബിരുദം (റീ ഹാബിലിറ്റേഷൻ കൗൺസലിങ്) CW പോസ്റ്റ് കോളേജിൽനിന്ന് മദ്യത്തിനും മയക്കു മരുന്നിനുമെതിരെ ബോധവത്ക്കരണ പരിശീലനം (സർട്ടിഫിക്കേഷൻ). വേദശാസ്ത്രഗവേഷണത്തിൽ ഡോക്ടറേറ്റ് ബിരുദവും നേടിയിട്ടുണ്ട്.
ഓർത്തഡോക്സ് സഭയിലെ പ്രമുഖ സുവിശേഷ പ്രസംഗകരിൽ ഒരാളും വേദശാസ്ത്രപണ്ഡിതനും ധ്യാന ഗുരുവും മികച്ച സംഘാടകനുമായിരുന്നു ശങ്കരത്തിൽ കോർ എപ്പിസ്‌ക്കോപ്പ. വേദശാസ്ത്രത്തിൽ ഉപരിപഠനത്തിനായി (STM) ന്യൂയോർക്കിലെ യൂണിയൻ തിയോളജിക്കൽ സെമിനാരിയിൽ നിന്ന് എക്യുമെനിക്കൽ സ്‌കോളർഷിപ്പ് ലഭിച്ച് 1970 സെപ്റ്റംബർ 12-ന് അമേരിക്കയിൽ എത്തി. പഠനം പൂർത്തിയാക്കിയതിനെത്തുടർന്ന് കിഴക്കിന്റെ കാതോലിക്കാ, പരിശുദ്ധ ബസ്സേലിയോസ് ഔഗേൻ ബാവാ അമേരിക്കയിൽ മലങ്കരസഭയുടെ ഇടവകകൾ സ്ഥാപിക്കുവാൻ 1971 ഓഗസ്റ്റ് 2-ന് നിയമിച്ച് കല്പന നൽകി. 1971 ഡിസംബറിൽ അമേരിക്കയിലെ മലങ്കരസഭയുടെ പ്രഥമ ഔദ്യോഗിക ഇടവകയായ ന്യൂയോർക്ക് സെന്റ് തോമസ് ഇടവക രൂപീകരിക്കുകയും ബാഹ്യകേരള ഭദ്രാസനത്തിൽ ഉൾപ്പെടുത്തുകയും ആ ഇടവകയുടെ വികാരിയായി 1977 വരെ തുടരുകയും ചെയ്തു. സെന്റ് തോമസ് ചർച്ച് ന്യൂയോർക്ക്, സെന്റ് ഗ്രിഗോറിയോസ് ചർച്ച് എൽമോണ്ട്, സെന്റ് തോമസ് ചർച്ച് ഡിട്രോയിറ്റ്, സെന്റ് തോമസ് ചർച്ച് വാഷിങ്ടൺ ഡി.സി., സെന്റ് ജോർജ് ചർച്ച്, സ്റ്റാറ്റൻ ഐലൻഡ്, സെന്റ് തോമസ് ചർച്ച് ഫിലാഡൽഫിയ, സെന്റ് തോമസ് ചർച്ച്, ലോംഗ് ഐലൻഡ്, ന്യൂയോർക്ക് മുതലായ ഇടവകകളുടെ സ്ഥാപനത്തിലും വളർച്ചയിലും നിർണ്ണായകമായ പങ്കുവഹിച്ചു. 1986 മുതൽ ലോംഗ് ഐലൻഡ് സെന്റ് തോമസ് ഇടവകയുടെ വികാരിയായി തുടരുന്ന കോർ എപ്പിസ്‌ക്കോപ്പ അമേരിക്കയിൽ രൂപീകരിച്ച ഏഴു പള്ളികളും ഇന്ന് ഭദ്രാസനത്തിൽ മികവോടെ നിലകൊള്ളുന്നു.
അമേരിക്കൻ ഭദ്രാസന രൂപീകരണത്തിലും വളർച്ചയിലും നിർണായക പങ്കുവഹിച്ചു. ഭദ്രാസന കൗൺസിൽ മെമ്പർ, ഭദ്രാസന ക്ലെർജി അസോസിയേഷൻ സെക്രട്ടറി എന്നീ നിലകളിലും പ്രവർത്തിച്ചു. മലങ്കര സഭാ മാനേജിങ് കമ്മിറ്റി അംഗമായി അഞ്ചു വർഷമായി പ്രവർത്തിക്കുന്നു. ചരിത്രത്തിൽ ആദ്യമായി കിഴക്കിന്റെ കാതോലിക്കാ പരിശുദ്ധ ബസേലിയോസ് മാർത്തോമ്മാ മാത്യൂസ് പ്രഥമൻ ബാവാ അമേരിക്ക സന്ദർശിച്ച അവസരത്തിൽ (1979-ൽ) അതിനുള്ള ക്രമീകരണങ്ങൾ ഭദ്രാസന മെത്രാപ്പൊലീത്തായോടൊപ്പം ചെയ്തു. സ്വീകരണ കമ്മറ്റിയുടെ ജനറൽ കൺവീനറായി പ്രവർത്തിച്ചു.
പന്തളം, തലനാട് കുടുംബയോഗ രക്ഷാധികാരി, വിളയിൽ ശങ്കരത്തിൽ ശാഖാ കുടുംബയോഗ പ്രസിഡന്റ്, അമേരിക്കയിലെ ശങ്കരത്തിൽ കുടുംബയോഗ പ്രസിഡന്റ് എന്നീ നിലകളിലും പ്രവർത്തിക്കുന്നു. ശങ്കരത്തിൽ മാത്യൂസ് കോർ എപ്പിസ്‌ക്കോപ്പായുടെ സഹോദരപുത്രനായ ഇദ്ദേഹം ശങ്കരത്തിൽ കുടുംബത്തിൽ നിന്നുള്ള രണ്ടാമത്തെ കോർ എപ്പിസ്‌ക്കോപ്പയാണ്.
കടമ്പനാട് താഴേതിൽ മുണ്ടപ്പള്ളിൽ റിട്ട. ഹെഡ്‌മാസ്റ്റർ റ്റി.ജി. തോമസിന്റെ മകൾ സുപ്രസിദ്ധ കവയിത്രി ശ്രീമതി എൽസി യോഹന്നാൻ (റിട്ട. എൻജിനീയർ, നാസാ കൗണ്ടി DPW)യാണ് സഹധർമ്മിണി. മാത്യു, തോമസ് എന്നിവരാണ് മക്കൾ
വൈദികൻ എന്ന നിലയിലും വ്യക്തി എന്ന നിലയിലും അമേരിക്കയിലെ ഇന്ത്യൻ സമൂഹത്തിലും ഓർത്തഡോക്സ് സഭക്കും വന്ദ്യ യോഹന്നാൻ ശങ്കരത്തിൽ കോർ എപ്പിസ്‌ക്കോപ്പ നൽകിയ സേവനങ്ങളെ കൃതജ്ഞതാപൂർവം സ്മരിക്കുകയും ശങ്കരത്തിൽ കുടുംബാഗങ്ങളുടെയും ഇടവകാഗങ്ങളുടെയും ദുഃഖത്തിൽ പങ്ക് ചേരുകയും പ്രാർത്ഥനാ പൂർവ്വമായ അനുശോചനം അറിയിക്കുകയും ചെയ്യുന്നു.
വെരി റവ.ഡോ.യോഹന്നാൻ ശങ്കരത്തിൽ കോർ എപ്പിസ്‌കോപ്പയുടെ ദേഹവിയോഗത്തിൽ അനുശോചനം
അവിഭക്ത അമേരിക്കൻ ഭദ്രാസനത്തിലെ സീനിയർ വൈദികരിൽ ഒരാളായ വെരി റവ. ഡോ. യോഹന്നാൻ ശങ്കരത്തിൽ കോർ എപ്പിസ്‌കോപ്പയുടെ ദേഹവിയോഗത്തിൽ സൗത്ത് വെസ്റ്റ് അമേരിക്കൻ ഭദ്രാസനത്തിന്റെ സഹായ മെത്രാപൊലീത്ത അഭിവന്ദ്യ ഡോ.സഖറിയാ മാർ അപ്രേം, ഭദ്രാസന സെക്രട്ടറി ഫാ.ഫിലിപ്പ് ഏബ്രഹാം,, വൈദീക സെക്രട്ടറി ഫാ.മാത്യൂസ് ജോർജ്ജ്, ഓർത്തോഡോക്‌സ് റ്റിവിക്കു വേണ്ടി മാധ്യമ വിഭാഗം ചെയർമാൻ അഭിവന്ദ്യ ഡോ.ഗീവർഗീസ് മാർ യൂലിയോസ് മെത്രാപൊലീത്ത, ഫാ.ജോൺസൺ പുഞ്ചക്കോണം എന്നിവർ അനുശോചനം രേഖപ്പെടുത്തി.
ഫൊക്കാനക്ക് വേണ്ടി പ്രസിഡണ്ട് ജോർജ്ജ് വർഗ്ഗീസ്, സെക്രട്ടറി ഡോ സജിമോൻ ആന്റണി, ട്രഷറർ സണ്ണി മറ്റമന, ട്രസ്റ്റീ ബോർഡ് ചെയർമാൻ ഫിലിപ്പോസ് ഫിലിപ്പ് എന്നിവരും, കേരള റ്റയിമ്‌സിനുവേണ്ടി മാനേജിഗ് ഡയറക്ടർ പോൾ കറുകപ്പള്ളിൽ, ചീഫ് എഡിറ്റർ ഫ്രാൻസിസ് തടത്തിൽ എന്നിവരും അനുശോചനം രേഖപ്പെടുത്തി.
