കൊച്ചി: പുതുമഖ സംവിധായകനായ ഡൊമിനിക് അരുണിന്റെ ചിത്രമായ തരംഗം തിയറ്ററുകളിലേക്ക്. ടോവിനോ തോമസ്, ബാലു വർഗീസ് എന്നിവരെ പ്രധാന കഥാപാത്രങ്ങളാക്കി ഒരുക്കുന്ന ഈ ചിത്രം നിർമ്മിക്കുന്നത് നടൻ ധനുഷ്, മിനി സ്റ്റുഡിയോ എന്നിവർ ചേർന്നാണ്.

ഇതാദ്യമായാണ് ധനുഷിന്റെ വണ്ടർബാർ ഫിലിംസ് ഒരു മലയാള ചിത്രം നിർമ്മിക്കുന്നത്. അനിൽ നാരായണനാണ് തിരക്കഥ. 'ദ ക്യൂരിയസ് കേസ് ഓഫ് കള്ളൻ പവിത്രൻ' എന്നാണ് ചിത്രത്തിന്റെ ടാഗ്ലൈൻ. പുതുമുഖം ശാന്തി ബാചന്ദ്രൻ നായികയാകുന്ന ചിത്രത്തിൽ ലാൽ, മനോജ് കെ. ജയൻ, ദിലീഷ് പോത്തൻ, അലൻസിയാർ, വിജയരാഘവൻ, ശരത്, സൈജു കുറുപ്പ്, സഞ്ജു ശിവറാം, പൂജപ്പുര രവി, സജീവ്, ഷമ്മി തിലകൻ, ജോയ്, സന്ദീപ്, നവമി ഗായക്, നേഹ അയ്യർ, നീരജ, ക്രിസ്റ്റീന, അന്പിളി തുടങ്ങിയവരും അഭിനയിക്കുന്നു. 

ട്രാഫിക് പൊലീസുകാരായ പപ്പനും ജോയിയുമായാണ് ടോവിനോയും ബാലു വർഗീസുമെത്തുന്നത്. ഇരുവരും സസ്‌പെൻഷനിലാണ്. ആന്റണി ഗോൺസാൽവസ് നേതൃത്വം നൽകുന്ന സിഐഡിയുടെ ഐഡൽ വിംഗിലായിരുന്നു ഇരുവർക്കും ജോലി. ജോലി ഇല്ലാതായതോടെ ഇരുവരും തങ്ങളുടെ ഭീമമായ കടം വീട്ടാൻ പുതിയൊരു ദൗത്യം ഏറ്റെടുക്കുന്നു. ഇതിനിടയിലുണ്ടാകുന്ന സംഭവവികാസങ്ങളാണ് ചിത്രം പറയുന്നത്.