ന്യൂഡൽഹി: ഇന്ത്യയിൽ ഓൺലൈൻ ബാങ്കിംഗിലേക്കും മറ്റു സാമ്പത്തിക ഇടപാടുകളിലേക്കും കടക്കുന്ന ഉപഭോക്താക്കളുടെ എണ്ണം ഉയരുന്നതനുസരിച്ച് തട്ടിപ്പുകൾക്കുള്ള ശ്രമങ്ങളും വർധിക്കുന്നതായി ട്രാൻസ് യൂണിയന്റെ റിപ്പോർട്ട്. 2020 സെപ്റ്റംബർ ഒന്നു മുതൽ ഡിസംബർ 31 വരെയുള്ള നാല് മാസങ്ങളെ അപേക്ഷിച്ച് 2021 ജനുവരി ഒന്നു മുതൽ മെയ് ഒന്നു വരെയുള്ള നാല് മാസകാലത്ത് ഇന്ത്യയിൽ നിന്നുള്ള സാമ്പത്തിക സേവന ബിസിനസുകളിൽ ഡിജിറ്റൽ തട്ടിപ്പ് ശ്രമങ്ങളെന്ന് സംശയിക്കപ്പെടുന്നവയുടെ കാര്യത്തിൽ 89 ശതമാനം വർധനവുണ്ടായി. ആഗോള തലത്തിൽ സാമ്പത്തിക സേവന തട്ടിപ്പ് ശ്രമങ്ങളിൽ 149 ശതമാനമാണ് വർധനവാണുണ്ടായത്. ഉയർന്ന മൂല്യമുള്ള ഇടപാടുകളെയാണ് തട്ടിപ്പുകാർ കൂടുതലും ലക്ഷ്യം വയ്ക്കുന്നത്.

ആഗോള തലത്തിൽ 40,000 വെബ്സൈറ്റുകളിലും ആപ്പുകളിലും നടന്ന കോടിക്കണക്കിന് ഇടപാടുകളിൽ നടത്തിയ വിശകലനത്തെ തുടർന്നാണ് ട്രാൻസ് യൂണിയൻ ഈ നിഗമനത്തിലെത്തിയത്. ഇന്ത്യയടക്കം ലോകത്തിന്റെ വിവിധ ഭാഗങ്ങളിൽ നിന്നുള്ള ട്രാഫിക്കാണ് ഈ വെബ്‌സൈറ്റുകളിലേക്കും ആപ്പുകളിലേക്കും എത്തുന്നത്.

ആഗോള വ്യാപകമായി ഡിജിറ്റൽ തട്ടിപ്പ് ശ്രമങ്ങൾ ഉയരുകയാണെന്ന് ഇതേക്കുറിച്ചു പ്രതികരിച്ച ട്രാൻസ് യൂണിയൻ ഇന്ത്യയുടെ എക്സിക്യൂട്ടീവ് വൈസ് പ്രസിഡന്റും തട്ടിപ്പുകൾ തടയുന്നതിനുള്ള വിഭാഗത്തിന്റെ മേധാവിയുമായ ഷലീൻ ശ്രീവാസ്തവ പറഞ്ഞു. ഉയർന്ന മൂല്യമുള്ള ഇടപാടുകൾ കൂടുതലും നടക്കുന്നതിനാൽ സാമ്പത്തിക സേവന രംഗത്താണ് തട്ടിപ്പുകൾക്കുള്ള കൂടുതൽ ശ്രമങ്ങൾ നടക്കുന്നതെന്നും അദ്ദേഹം കൂട്ടിച്ചേർത്തു.

ഇന്ത്യയിലെ ടെലികോം രംഗത്ത് തട്ടിപ്പ് സംശയിക്കുന്ന സംഭവങ്ങളുടെ കാര്യത്തിൽ 18.54 ശതമാനവും യാത്രകളുമായി ബന്ധപ്പെട്ട രംഗങ്ങളിൽ 11.57 ശതമാനവും വർധനവാണുണ്ടായത്. ഗെയിമിംഗുമായും ലോജിസ്റ്റിക്കുമായും ബന്ധപ്പെട്ട തട്ടിപ്പ് ശ്രമങ്ങളെന്ന് സംശയിക്കുന്നവയുടെ കാര്യത്തിൽ കുറവുണ്ടായതായും റിപ്പോർട്ട് സൂചിപ്പിക്കുന്നു.

ഡിജിറ്റൽ തട്ടിപ്പ്

മറുനാടന്‍ മലയാളി

    മറുനാടന്‍ മലയാളി ബ്യൂറോ