നടിയെ ആക്രമിച്ച കേസ്; ദൃശ്യങ്ങൾ അടങ്ങിയ മെമ്മറി കാർഡ് കോടതിയിൽ വച്ച് നിയമവിരുദ്ധമായി തുറന്നു; ദൃശ്യങ്ങൾ കണ്ടതാണോ പകർത്തിയതാണോ എന്ന് വ്യക്തമല്ലെന്നും ക്രൈംബ്രാഞ്ച്

കൊച്ചി: നടിയെ ആക്രമിച്ച ദൃശ്യങ്ങളടങ്ങിയ മെമ്മറി കാർഡ് കോടതിയിൽ വച്ചു നിയമവിരുദ്ധമായി തുറന്നുവെന്ന് ക്രൈംബ്രാഞ്ചിന്റെ സ്ഥിരീകരണം. ദൃശ്യങ്ങൾ എറണാകുളം ജില്ലാ കോടതിയിൽ നിന്ന് ചോർന്നുവെന്ന നടിയുടെ പരാതിയുടെ അടിസ്ഥാനത്തിൽ ഹൈക്കോടതി അന്വേഷണം നടക്കുന്നതിനിടെയാണ് അന്വേഷണസംഘത്തിന്റെ സ്ഥിരീകരണം.

ദൃശ്യങ്ങളടങ്ങിയ മെമ്മറി കാർഡ് കോടതിയിൽ വച്ച് നിയമവിരുദ്ധമായി തുറന്നുവെന്ന് അന്വേഷണ സംഘം വിചാരണക്കോടതിയിൽ റിപ്പോർട്ട് നൽകി.എന്നാൽ മെമ്മറി കാർഡിലെ ദൃശ്യങ്ങൾ കാണുകയാണോ അതോ പകർത്തിയതാണോ എന്നു വ്യക്തമല്ല.ഇതിൽ വിശദമായ റിപ്പോർട്ട് മുദ്രവച്ച കവറിൽ കൈമാറാൻ വിചാരണക്കോടതി അന്വേഷണ ഉദ്യോഗസ്ഥനു നിർദ്ദേശം നൽകിയിട്ടുണ്ട്.

അതേസമയം, നടിയെ ആക്രമിച്ച കേസിലെ തുടരന്വേഷണ റിപ്പോർട്ട് ക്രൈംബ്രാഞ്ച് കോടതിയിൽ സമർപ്പിച്ചെങ്കിലും. വിശദമായ റിപ്പോർട്ടു നൽകാൻ കോടതി ആവശ്യപ്പെട്ടു. ഇതു പരിശോധിച്ച ശേഷം മാത്രം കൂടുതൽ സമയം നൽകണോ എന്നു തീരുമാനിക്കുമെന്നു കോടതി അറിയിച്ചു. തുടരന്വേഷണത്തിനു കൂടുതൽ സമയം നൽകുന്നതിനെ എതിർത്തു കേസിലെ പ്രതിയായ നടൻ ദിലീപും കോടതിയിൽ ഹർജി നൽകും.