കൊച്ചി: ഈ വിഷുക്കാലത്ത് വീണ്ടും നേർക്കു നേർ മത്സരത്തിനെത്തുകയാണ് മഞ്ജു വാര്യരും ദിലീപും. മലയാള സിനിമയിലെ ലേഡി സൂപ്പർ സ്റ്റാറിന്റെ വരവ് മോഹൻലാലുമായാണ്. കട്ട ലാൽ ഫാനിന്റെ വേഷത്തിൽ മഞ്ജു നിറയുമ്പോൾ തിയേറ്റുകളിൽ ഉൽസവമാകുമെന്നാണ് പ്രതീക്ഷ. തന്റെ പതിവ് പ്രേക്ഷകർക്കൊപ്പം മോഹൻലാലിന്റെ ആരാധകരെ മുഴുവൻ തിയേറ്ററിലെത്തിക്കാനാണ് മീനക്കുട്ടിയിലൂടെ മഞ്ജുവിന്റെ നീക്കം. രാമലീലയുടെ ആവേശത്തിൽ ദിലീപും. കമ്മാരസംഭവം സൂപ്പറാകുമെന്നാണ് ആരാധക പ്രതീക്ഷ. നാല് ഗെറ്റപ്പിലെത്തുന്ന ദിലീപിനൊപ്പം കമ്മാരസംഭവത്തിൽ തമിഴ് നടൻ സിത്ഥാർത്ഥും ഉണ്ട്. അതുകൊണ്ട് തന്നെ തമിഴകത്തും കമ്മാരൻ തരംഗമായേക്കും.

സാധാരണ അഞ്ചലിധികം സിനിമകൾ വിഷുക്കാലത്ത് തിയേറ്ററിലെത്താറുണ്ട്. മോഹൻലാലും മമ്മൂട്ടിയും ആഘോഷത്തെ ആവേശമാക്കാൻ വിഷുക്കാലത്ത് പതിവായുണ്ടാകും. ഇത്തവണയും വിഷുവിന് മമ്മൂട്ടിക്ക് ചിത്രമുണ്ടായിരുന്നു. പരോൾ. എന്നാൽ ഇത് വിഷുവിനും ഒരാഴ്ച മുമ്പേ തിയേറ്ററിലെത്തി. മോശം അഭിപ്രായമാണ് ചിത്രമുണ്ടാക്കിയത്. അതുകൊണ്ട് തന്നെ വിഷുവിന്റെ മത്സരത്തിൽ പരോളിന് കാര്യമായ റോളില്ല. മോഹൻലാൽ മനസ്സിൽ കണ്ടത് നിരാളിയെന്ന ചിത്രത്തെയാണ്. എന്നാൽ സാങ്കേതിക ജോലികൾ അവസാനിച്ചില്ല. അതിനാൽ റിലീസ് മേയിലേക്ക് മാറ്റി. പൃഥ്വിരാജിന്റെ രണം എല്ലാം പൂർത്തിയായതാണ്. എന്നാൽ ലേഡി സൂപ്പർ സ്റ്റാറും ജനപ്രിയ നായകനും തമ്മിലെ മത്സരം കാണാൻ രണം നീട്ടി. ഏപ്രിൽ 23ന് രണം റിലീസ് ചെയ്യുമെന്നാണ് സൂചന.