അവയവക്കടത്തിന്റെ ലോകം കാട്ടാൻ 'ഡോക്ടർ'; ശിവകാർത്തികേയൻ നായകനാവുന്ന ചിത്രത്തിന്റെ ട്രെയ്‌ലർ പുറത്ത്
ചെന്നൈ: പ്രക്ഷകർ ആകാംഷയോടെ കാത്തിരിക്കുന്ന ചിത്രമാണ് ഡോക്ടർ.ഒക്ടോബർ 9നാണ് തമിഴ്, തെലുങ്ക് ഭാഷകളിൽ ചിത്രം തിയറ്ററുകളിലെ ത്തുന്നത്. 'വരുൺ ഡോക്ടർ' എന്നാണ് ചിത്രത്തിന്റെ തെലുങ്ക് ടൈറ്റിൽ. ഇപ്പോഴിതാ മെഡിക്കൽ-ക്രൈം ആക്ഷൻ ത്രില്ലർ എന്ന് അണിയറക്കാർ വിശേഷിപ്പിക്കുന്ന ചിത്രത്തിന്റെ ട്രെയ്‌ലർ പുറത്തെത്തിയിരിക്കുകയാണ്.
ശിവകാർത്തികേയന്റെ കരിയറിലെ ശ്രദ്ധേയ ചിത്രങ്ങളിലൊന്നാവും ഡോക്ടർ എന്ന പ്രതീക്ഷ പകരുന്നതാണ് ട്രെയ്‌ലർ. അവയവ വ്യാപാരത്തിന്റെ കാണാപ്പുറങ്ങളും അതോട് ചേർന്നു പ്രവർത്തിക്കുന്ന അധോലോകവുമൊക്കെയാണ് സിനിമയുടെ പശ്ചാത്തലമാവുന്നത്. 'കോലമാവ് കോകില' ഒരുക്കിയ നെൽസൺ ദിലീപ്കുമാർ ആണ് സംവിധാനം. വിജയ്‌യുടെ പുതിയ ചിത്രം 'ബീസ്റ്റ്' സംവിധാനം ചെയ്യുന്നതും ഇദ്ദേഹമാണ്.
പ്രിയങ്ക അരുൾ മോഹൻ, വിനയ് റായ്, മിലിന്ദ് സോമൻ, ഇളവരസ്, യോഗി ബാബു, ദീപ, അരുൺ അലക്‌സാണ്ടർ, റെഡിൻ കിങ്‌സ്‌ലി, സുനിൽ റെഡ്ഡി, അർച്ചന, ശിവ അരവിന്ദ്, രഘു റാം, രാജീവ് ലക്ഷ്മൺ എന്നിവർ മറ്റു കഥാപാത്രങ്ങളെ അവതരിപ്പിക്കുന്നു. വിജയ് കാർത്തിക് കണ്ണൻ ആണ് ഛായാഗ്രഹണം. എഡിറ്റിങ് ആർ നിർമ്മൽ, സംഗീതം അനിരുദ്ധ് രവിചന്ദർ, സംഘട്ടനം അൻപറിവ്, കൊറിയോഗ്രഫി ജാനി. ശിവകാർത്തികേയൻ പ്രൊഡക്ഷൻസിന്റെ ബാനറിൽ ശിവകാർത്തികേയൻ ആണ് നിർമ്മാണം. സഹനിർമ്മാണവും വിതരണവും കെജെആർ സ്റ്റുഡിയോസ്.
