കല്യാണം എന്താ എന്തെങ്കിലും ബഹുമതിയാണോ; മാധ്യമപ്രവർത്തകന് നടി വരലക്ഷ്മി നൽകിയ മറുപടി ചർച്ചയാകുന്നു

വിവാഹത്തെക്കുറിച്ച് ചോദിച്ച മാധ്യമപ്രവർത്തകനോടുള്ള നടി വരലക്ഷ്മിയുടെ പ്രതികരണമാണ് ചർച്ചയാവുന്നത്. വിവാഹം എപ്പോഴായിരിക്കും എന്നു ചോദ്യത്തോട് രൂക്ഷമായാണ് താരം പ്രതികരിച്ചത്. കല്യാണം എന്താ എന്തെങ്കിലും ബഹുമതിയാണോ എന്നായിരുന്നു വരലക്ഷ്മിയുടെ മറുപടി.

'ഇനി ഒരിക്കലും ഇത്തരം ചോദ്യങ്ങൾ ആവർത്തിക്കരുത്. പുരുഷന്മാരെപ്പോലെ സ്ത്രീകൾക്കും അവരുടേതായ ആഗ്രഹങ്ങളും സ്വപ്‌നങ്ങളുമുണ്ട്. അത് കേവലം വിവാഹത്തിൽ മാത്രം ഒതുങ്ങുന്നതല്ല- വരലക്ഷ്മി പറഞ്ഞു. ഒരു സ്വകാര്യ ആശുപത്രി സംഘടിപ്പിച്ച ചടങ്ങിൽ അമ്മ ഛായയ്‌ക്കൊപ്പം മുഖ്യാതിഥിയായി എത്തിയതായിരുന്നു താരം. പരിപാടിക്കിടെ മാധ്യമങ്ങളോട് സംസാരിക്കുന്നതിനിടെയാണ് വിവാഹ ചോദ്യം ഉയർന്നത്.

മുതിർന്ന നടൻ ശരത്കുമാറിന്റെ മകളായ വരലക്ഷ്മി 2012 ൽ സിമ്പു നായകനായ പോടാ പോടീ എന്ന ചിത്രത്തിലൂടെയാണ് സിനിമയിലെത്തിയത്. തമിഴിലും തെലുങ്കിലും മാത്രമല്ല മലയാളത്തിലും ശ്രദ്ധേയമായ കഥാപാത്രങ്ങളെ അവതരിപ്പിച്ചിട്ടുണ്ട്. മമ്മൂട്ടി പ്രധാനവേഷത്തിലെത്തിയ കസബയിലെ കഥാപാത്രം വളരെ ശ്രദ്ധ നേടിയിരുന്നു. ഈ വർഷം ഏഴോളം സിനിമകളാണ് വരലക്ഷ്മിയുടേതായി പുറത്തിറങ്ങാനിരിക്കുന്നത്.