താമ്പാ (ഫ്ലോറിഡ) : ഭാവമധുരമായ ആവിഷ്‌കാരത്തിലൂടെ ദൃശ്യചാരുതകൾ തീർക്കുന്ന മയാമി സംഘമിത്രയുടെ പുതിയ നാടകം 'കുരുത്തി' നവംബർ 13 ശനിയാഴ്ച താമ്പാ ക്ലാനായ കമ്യൂണിറ്റി സെന്റററിൽ വച്ച് അരങ്ങേറും .

താമ്പാ ക്ലാനായ കമ്യൂണിറ്റി സെന്റററിനോട് അനുബന്ധിച്ചുള്ള സ്പോർട്സ് സെന്റർ കോംപ്ലക്‌സിന്റെ ധനശേഖരണാർത്ഥം ആണ് പ്രോഗ്രാം സംഘടിപ്പിക്കുന്നത് .

അത്യാധുനിക മാതൃകയിൽ നൂതന സാങ്കേതികവിദ്യകൾ ഉപയോഗിച്ച് നിർമ്മിച്ച് വരുന്ന 'സ്പോർട്സ് സെന്റർ' ഫ്ലോറിഡായിലെന്നല്ല അമേരിക്കൻ മലയാളികൾക്കെല്ലാം തന്നെ ഒരു മുതൽക്കൂട്ടായിരിക്കുമെന്ന് ബിൽഡിങ് കമ്മിറ്റി ചെയർമാൻ റ്റോമി മ്യാൽക്കരപ്പുറത്ത്, പ്രസിഡന്റ് സജി കടിയംപള്ളിൽ, ബോർഡ് അംഗങ്ങൾ എന്നിവർ ഒരു സംയുക്ത പ്രസ്താവനയിലൂടെ അറിയിച്ചു .

കൂടാതെ നവംബർ 13 ന് നടക്കുന്ന നാടകത്തോടനുബന്ധിച്ച് തികച്ചും സൗജന്യമായി ക്ലാനായ കമ്യുണിറ്റിയുടെ ആഭിമുഖ്യത്തിൽ കോവിഡ് പ്രതിരോധ വാക്സിന്റെ മൂന്നാംഘട്ടമായ 'ബൂസ്റ്റർ ഡോസ്' ആവശ്യമായ എല്ലാവർക്കും നൽകുന്നതാണ് . പ്രസ്തുത ക്രമീകരണങ്ങൾ സെന്ററിനോടനുബന്ധിച്ചുള്ള മെഡിക്കൽ ഓഫീസിൽ ക്രമീകരിച്ചിട്ടുണ്ട് . ഒരു മെഡിക്കൽ വിദഗ്ധ സംഘം തന്നെ ഇതിനായി പ്രവർത്തിച്ചു വരുന്നു .

ചാരിറ്റിയിൽ ഊന്നിയിട്ടുള്ള പ്രവർത്തനങ്ങളാണ് മയാമി സംഘമിത്രയുടെ ചാലകശക്തി എന്ന് വിശേഷിക്കപ്പെടുന്നത് വേറിട്ട ദൃശ്യാനുഭവങ്ങളും അവതരണത്തിലെ പുതുമകളും സംഘമിത്രയുടെ എക്കാലത്തെയും പ്രത്യേകതകളാണ് .അക്രമരാഷ്ട്രീയം അഴിഞ്ഞാടുമ്പോൾ അനാഥമാക്കപ്പെടുന്ന ഒരു കൂട്ടം മനുഷ്യരുടെ കഥയാണ് ഈ നാടകത്തിന്റെ ഇതിവൃത്തം .

കലയെയും കലാകാരന്മാരെയും എക്കാലത്തും പ്രോത്സാഹിപ്പിച്ചു കൊണ്ടിരിക്കുന്ന സംഘമിത്രയുടെ ഈ നാടകത്തിൽ ഇരുപതോളം കലാകാരന്മാർ വേഷപ്പകർച്ച പങ്കിടുന്നു . അത്രയും തന്നെ കലാകാരന്മാർ അണിയറയിൽ രംഗ സജ്ജീകരണങ്ങൾക്ക് മേൽനോട്ടം വഹിക്കുന്നു .സിനിമാസ്‌കോപ്പ് മാതൃകയിൽ ലേറ്റസ്റ് മെഗാ എൽ.ഇ.ഡി സ്‌ക്രീൻ ഉപയോഗിച്ചാണ് നാടകം വേദിയിൽ അവതരിപ്പിക്കുന്നത് .

പ്രശസ്ത നാടക രചയിതാവ് ഹേമന്ദകുമാർ രചനയും , നോയൽ മാത്യു സംവിധാനവും നിർവഹിച്ചിട്ടുള്ള ഈ കലാവിരുന്നിന്റെ സാരഥി ജോയ് കുറ്റിയാനിയാണ് കൂടാതെ സിക്രട്ടറി ബാബു കല്ലിടുക്കിൽ , ട്രഷറർ ഉല്ലാസ് കുര്യാക്കോസ് തുടങ്ങി കലാസാഹിത്യ പ്രേമികളുടെ ബൃഹത്തായ കമ്മിറ്റിയും പ്രവർത്തിച്ചു വരുന്നു .

ഇതിനോടകം സംഘമിത്ര അഞ്ച് നാടകങ്ങളാണ് വേദിയിൽ അവതരിപ്പിച്ച് കഴിഞ്ഞിട്ടുള്ളത് . 'കുരുത്തി' എന്ന ഈ നാടകത്തിൽ നിന്നും ലഭിച്ച തുക കൊണ്ട് കേരളത്തിലെ പ്രശസ്തമായ ഒരു നാടകസമിതിയിലെ കലാകാരന്റെ കുടുംബത്തിന് അതിമനോഹരമായ ഒരു ഭവനം നിർമ്മിച്ചു കൊടുക്കുന്നതിനുള്ള ക്രമീകരണങ്ങൾ ഇതിനോടകം പൂർത്തീകരിച്ചു കഴിഞ്ഞു
പ്രസ്തുത വീടിന്റെ താക്കോൽ ദാനം നവംബർ 6 ശനിയാഴ്ച ഇന്ത്യൻ സമയം 3 മണിക്ക് അഭിവന്ദ്യ പാലാ രൂപതബിഷപ്പ് മാർ ജോസഫ് കല്ലറങ്ങാട്ട് കേരളത്തിലെ പാലായിൽ വച്ച് നിർവഹിക്കുന്നതായിരിക്കും .ഈ നാടക വിരുന്നിലേക്ക് എല്ലാ കലാസ്നേഹികളെയും സാദരം ക്ഷണിക്കുന്നതായി ഭാരവാഹികൾ അറിയിച്ചു .

കുരുത്തി