നീരാളി എന്ന് ചിത്രത്തിലെ അടിപൊളി ഗാനത്തിന് ശേഷം മറ്റൊരു തട്ടുപൊളിപ്പൻ പാട്ടുമായി മോഹൻലാൽ എന്ന ഗായകൻ വീണ്ടുമെത്തുകയാണ്. മോഹൻലാൽ-രഞ്ജിത്ത് കൂട്ടുകെട്ടിൽ പുറത്തിറങ്ങുന്ന ചിത്രം ഡ്രാമയിലാണ് ലാലേട്ടന്റെ പാട്ടുള്ളത്. ചിത്രത്തിന്റെ പ്രോമോ സോങാണ് മോഹൻലാൽ തകർത്ത് പാടിയിരിക്കുന്നത്. മോഹൻലാൽ തന്നെയാണ് ഗാനത്തിന്റെ വീഡിയോ ഫേസ്‌ബുക്കിലൂടെ പുറത്ത് വിട്ടത്.

പണ്ടാരോ ചൊല്ലീട്ടില്ലേ, പാണൻ പാട്ടിൽ കേട്ടിട്ടില്ലേഎന്ന് തുടങ്ങുന്ന ഗാനത്തിൽ ചിത്രത്തിന്റെ ഷൂട്ടിങ് ലൊക്കേഷൻ കാഴ്‌ച്ചകളാണുള്ളത്. മോഹൻലാലും രഞ്ജിത്തും മറ്റ് അഭിനേതാക്കളും അണിയറ പ്രവർത്തകരെല്ലാം വീഡിയോയിൽ വന്ന് പോകുന്നുണ്ട്.

ലോഹത്തിനു ശേഷം രഞ്ജിത്തും മോഹൻലാലും ഒന്നിക്കുന്ന ചിത്രമാണിത്. പുത്തൻ പണത്തിനു ശേഷം രഞ്ജിത് തന്നെ കഥയെഴുതി സംവിധാനം ചെയ്യുന്ന ചിത്രം കൂടിയാണ് ഡ്രാമ, ലണ്ടനിൽ ചിത്രീകരിച്ചിട്ടുള്ള ഡ്രാമ&യിൽ ആശാ ശരത് ആണ് നായിക. ഇവരെ കൂടാതെ സുരേഷ് കൃഷ്ണ, മുരളി മേനോൻ, സുബി സുരേഷ് എന്നിവരും ഈ ചിത്രത്തിൽ ഉണ്ടാകും.

വർണചിത്ര ബിഗ് സ്‌ക്രീനിന്റെ ബാനറിൽ മഹാസുബൈറാണ് ഈ ചിത്രം നിർമ്മിക്കുന്നത്. മലയാള സിനിമയ്ക്ക് നിരവധി ഹിറ്റ് ചിത്രങ്ങൾ സമ്മാനിച്ച മോഹൻലാൽ-രഞ്ജിത്ത് കൂട്ടുകെട്ടിന്റെ പുതിയ ചിത്രത്തിനെ വലിയ പ്രതീക്ഷകളോടെയാണ് ആരാധകർ കാത്തിരിക്കുന്നത്.

ഇതിനോടകം റിലീസ് ചെയ്തു കഴിഞ്ഞ ചിത്രത്തിന്റെ ടീസറിന് ലാൽ ആരാധകരിൽ നിന്നും നല്ല പ്രതികരണങ്ങളാണ് ലഭിക്കുന്നത്. ഓടിവന്ന് കാറിലേക്ക് മറിയുന്ന സൂപ്പർസ്റ്റാറിനെയാണ് ടീസറിൽ കാണുന്നത്. എന്നാൽ ചിത്രത്തിന്റെ പ്രോമോ സോങ് എത്തിയതോടെ ട്രോളർമാർ നിരവധി ട്രോളുകളുമായി എത്തിയിട്ടുണ്ട്.