കൊച്ചിയിൽ കഞ്ചാവ്, ലഹരിമരുന്ന് കച്ചവടം; പരാതി ലഭിച്ചതിനെ തുടർന്നു നടത്തിയ പരിശോധന രണ്ടു പേർ പിടിയിൽ

കൊച്ചി: കഞ്ചാവും നൈട്രോസെപാം മയക്കുമരുന്നിനത്തിൽപ്പെട്ട ഗുളികകളുമായി യുവാക്കൾ പിടിയിൽ. വാഴക്കാല കേന്ദ്രീകരിച്ച് കഞ്ചാവ് വിൽപന സജീവമാണെന്നുള്ള പരാതി ലഭിച്ചതിനെ തുടർന്നു നടത്തിയ പരിശോധനയിലാണു പ്രതികൾ പിടിയിലായത്.

വാഴക്കാല എൻജിഒ ക്വാർട്ടേഴ്സിന് സമീപം താമസിക്കുന്ന എറുകാട്ടുപറമ്പിൽ വീട്ടിൽ ഷാഫിർ സിദ്ദീഖ്, വയനാട് ബത്തേരി സ്വദേശി തെക്കേവളപ്പിൽ വീട്ടിൽ നിഷാദ് എന്നിവരെയാണ് എറണാകുളം എക്സൈസ് സർക്കിൾ ഇൻസ്പെക്ടർ അൻവർ സാദത്തിന്റെ നേതൃത്വത്തിലുള്ള സംഘം അറസ്റ്റ് ചെയ്തത്.

ഷാഫിർ സിദ്ദീഖിൽ നിന്നും 96 ഗ്രാം കഞ്ചാവും കഞ്ചാവ് വിറ്റ് കിട്ടിയ 3000 രൂപയും പിടിത്തെടുത്തു. നിഷാദിൽ നിന്നും 26 ഗ്രാം കഞ്ചാവും ആറു നൈട്രോസെപാം മയക്കുമരുന്നു ഗുളികകളും കണ്ടെടുത്തു. സിവിൽ എക്സൈസ് ഓഫിസർമാരായ സിദ്ധാർത്ഥ്, റെനി, വിജോ.പി.ജോർജ്, ജെയിംസ്, മനീഷ് എന്നിവർ ഉൾപ്പെട്ട സംഘമാണു പ്രതികളെ പിടികൂടിയത്.