കാസർഗോഡുകാരൻ മലേഷ്യയിൽ നിന്ന് കൊച്ചിയിൽ എത്തി ഹോട്ടൽ തുടങ്ങി; ഗോവയിൽ നിന്ന് ചരക്കെത്തിച്ച് കച്ചവടം; വിൽപ്പന മറയ്ക്കാൻ സൗഹൃദവലയവും ക്വട്ടേഷൻകാരേയും സൃഷ്ടിച്ചു; നിർണ്ണായകമായതുകൊച്ചി പൊലീസിന്റെ 'യോദ്ധാവിൽ' എത്തിയ സന്ദേശം; വൈപ്പിൻകാരി ആര്യയും കുടുങ്ങി; കൊച്ചി പൊലീസ് ഡ്രഗ് മാഫിയയെ കുടുക്കിയത് വാട്‌സാപ്പിൽ
കൊച്ചി: സിറ്റി ഡാൻസാഫും, സെൻട്രൽ പൊലീസും ചേർന്ന് എറണാകുളം സൗത്ത് ഭാഗങ്ങളിൽ നടത്തിയ രഹസ്യ പരിശോധനയിൽ പിടിച്ചെടുത്തത് വൻ തോതിൽ മയക്കുമരുന്ന്. ഒരു യുവതിയുൾപ്പെടെ മൂന്നു പേരെ ലക്ഷങ്ങൾ വില വരുന്ന എംഡിഎഎ, ഹാഷിഷ് ഓയിൽ, ഗഞ്ചാവ് മുതലായ മാരക ലഹരിമരുന്നുകളുമായി പൊലീസ് പിടികൂടി.
കാസർഗോഡ്,വടക്കേപ്പുറം, പടന്ന, നഫീസത്ത് വില്ലയിൽ സമീർ വി.കെ(35), കോതമംഗലം, നെല്ലിമറ്റം, മുളമ്പായിൽ വീട്ടിൽ അജ്മൽ റസാഖ് (32), വൈപ്പിൻ, ഞാറക്കൽ, പെരുമ്പിള്ളി, ചേലാട്ടു വീട്ടിൽ, ആര്യ ചേലാട്ട് (23) എന്നിവരെയാണ് പിടികൂടിയത്. ഇവരിൽ നിന്നും ലക്ഷങ്ങൾ വിലമതിക്കുന്ന 46 ഗ്രാം സിന്തറ്റിക് ഡ്രഗ്‌സായ എംഡിഎഎയും ,1.280 കിലോഗ്രാം ഹാഷിഷ് ഓയിലും, 340 ഗ്രാം കഞ്ചാവും കണ്ടെടുത്തു.
കാസർഗോഡുകാരനായ സമീർ വർഷങ്ങളായി മലേഷ്യയിൽ ജോലി ചെയ്തതിന് ശേഷം നാട്ടിൽ തിരിച്ചെത്തി കൊച്ചിയിൽ ഹോട്ടൽ, സ്റ്റേഷനറി കടകൾ നടത്തുന്നയാളാണ്. ഇതിന്റെ മറവിലാണ് ബാംഗ്ലൂരിൽ നിന്നും, ഗോവയിൽ നിന്നും നേരിട്ട് കൊണ്ടുവരുന്ന ലഹരിമരുന്നുകൾ ഇയാൾ വിറ്റഴിക്കുന്നത്. ഒരുഗ്രാം എംഡിഎഎ അയ്യായിരം മുതൽ ആറായിരം രൂപയും, ഹാഷിഷ് ഓയിൽ 3 മില്ലിഗ്രാമിന് ആയിരം മുതൽ രണ്ടായിരം രൂപ വരെയുമാണ് ഇവർ വില്പന നടത്തുന്നത്.
ഈ പ്രദേശത്ത് വലിയൊരു സൗഹൃദവലയം ഇയാൾക്ക് സഹായത്തിനായുണ്ട്. ക്വട്ടേഷൻ സംഘങ്ങളിലെ ആളുകളും രക്ഷയ്ക്കായി കൂടെയുണ്ട്. കൊച്ചിൻ പൊലീസ് കമ്മീഷണറേറ്റിന്റ 'ലഹരി മുക്ത കൊച്ചി'ക്കായി, മഹാനഗരത്തിൽ സജീവമായിക്കൊണ്ടിരിക്കുന്ന മയക്കുമരുന്ന് മാഫിയ സംഘങ്ങളെ പിടികൂടുന്നതിനു വേണ്ടി 'യോദ്ധാവ് ' എന്ന വാട്ട്‌സാപ്പ് കഴിഞ്ഞ വർഷമാണ് ആദ്യമയി കൊച്ചിയിൽ നടപ്പിലാക്കിയത്.
ഈ വാട്ട്‌സാപ്പിന്റെ പ്രത്യേകത രഹസ്യവിവരങ്ങൾ അയക്കുന്നയാളുടെ വിവരങ്ങൾ ആർക്കും കണ്ടു പിടിക്കാൻ കഴിയില്ല എന്നതാണ്. ഇതുപോലുള്ള മയക്കുമരുന്ന് സംഘങ്ങളെ കണ്ടാൽ വീഡിയോ ആയോ, ചിത്രങ്ങളായോ, സന്ദേശങ്ങളായൊ അയക്കാവുന്നതാണ്. ഇതാണ് കൊച്ചിയിലെ മയക്കുമരുന്ന് മാഫിയയെ കുടുക്കിയത്.
മയക്കുമരുന്ന് കള്ളക്കടത്തിനും, ദുരുപയോഗത്തിനും എതിരെ ഫലപ്രദമായ നടപടികളാണ് കമ്മീഷണറുമായ നാഗരാജു. ഐ.പി.എസ് ന്റെ നേതൃത്വത്തിൽ നടപ്പാക്കി വരുന്നത്. യോദ്ധാവിൽ കമ്മീഷണർക്ക് ലഭിച്ച രഹസ്യവിവരത്തിൽ സൈബർ സെല്ലിന്റെ സഹായത്തോടെ ഒരു മാസമായി നടത്തിയ രഹസ്യാന്വേഷണത്തിലാണ് പ്രതികൾ അറസ്റ്റിലായത്. മയക്കുമരുന്ന് കടത്ത് നിയന്ത്രിക്കുന്നതിനും, ഇല്ലായ്മ ചെയ്യുന്നതിനുമായി 100 ഓളം പൊലീസ് ഉദ്യോഗസ്ഥരെയും കമ്മീഷണറേറ്റിൽ വിന്യസിച്ചിട്ടുണ്ട്.
ജനുവരിയിൽ കൊച്ചി നഗരത്തിന്റെ വിവിധ ഭാഗങ്ങളിൽ നടത്തിയ പരിശോധനയിൽ തൃക്കാക്കര ഭാഗത്ത് നിന്ന് അഞ്ച് ലക്ഷം രൂപ വിലവരുന്ന 45 ഗ്രാം എംഡിഎഎ യുമായി വെണ്ണല, ചക്കരപറമ്പ് ,ഷിഹാബിനെയും, മലപ്പുറം കോട്ടക്കൽ ജുനൈദിനെയും, എളമക്കര ഭാഗത്തു നിന്നും മലപ്പുറം പൊന്നാനി സ്വദേശികളായ അജ്മൽ, അനസ് എന്നിവരെ 10 ഗ്രാം എംഡിഎഎ യുമായും, കളമശ്ശേരിയിൽ അരക്കിലോ ഗ്രാം ഗഞ്ചാവുമായി അങ്കമാലി മാർട്ടിനെയും അടക്കം അഞ്ചു പേരെ പിടികൂടി റിമാന്റ് ചെയ്ത് തുടർന്ന് അന്വേഷണം നടത്തി വരുന്നു.
കൊച്ചി സിറ്റിയിൽ മയക്കുമരുന്ന്, ഗഞ്ചാവ് മുതലായ മാരക ലഹരി വസ്തുക്കൾ വില്പന നടത്തുന്നതായി വിവരം ലഭിച്ചാൽ യോദ്ധാവ് വാട്ട്‌സാപ്പ് 9995966666 എന്ന നമ്പറിലോ, ഡാൻസാഫിന്റെ 9497980430 എന്ന നമ്പറിലോ അയക്കുക .അറിയിക്കുന്നവരുടെ പേരുവിവരങ്ങൾ രഹസ്യമായി സൂക്ഷിക്കുന്നതാണെന്ന് കമ്മീഷണർ അറിയിച്ചു.
