അടിമാലി: വട്ടവട പഴത്തോട്ടത്ത് പ്രവർത്തിക്കുന്ന മൊണ്ടാന ടെന്റ് ക്യാമ്പിൽ നിന്നും ലഹരി മരുന്ന് ശേഖരം പിടികൂടി. നടത്തിപ്പുകാരായ മൂന്നുപേർ അറസ്റ്റിൽ. ഇവിടെ നിശാപാർട്ടിക്കിടയിൽ മാരക ലഹരി മരുന്നുകൾ വിതരണംനടക്കുന്നതയുള്ള വിവരത്തിന്റെ അടിസ്ഥാനത്തിൽ ഇന്നലെ വൈകിട്ട് അടിമാലി നാർകോട്ടിക് എൻഫോഴ്സ്മെന്റ് സ്‌ക്വാഡ് നടത്തിയ റെയ്ഡിലാണ് രാസലഹരി വസ്തുക്കളായ എംഡി എം എ (മെത്തലീൻ ഡയോക്സിമെത്താം ഫിറ്റമിൻ) ,എൽ എസ് ഡി (ലൈസർജിക് ആസിഡ് ഡൈതലാമൈഡ്), ഹാഷിഷ് ഓയിൽ, ഉണക്ക ഗഞ്ചാവ് എന്നിവ കണ്ടെടുത്തത്.മൊബൈൽ ഫോണും ഏഴായിരത്തി ഇരുന്നൂറ് രൂപയും ഇവിടെ നിന്നും കസ്റ്റഡിയിൽ എടുത്തു.

ആലപ്പുഴ കോമളപുരം വില്ലേജിൽ ആര്യാട് കരയിൽ വാളശ്ശേരി വീട്ടിൽ സാജിദ്(25), മാമ്മൂട് കരയിൽ കളരിക്കൽ വീട്ടിൽ മുഹമ്മദ് ഷാദുൽ(22), എറണാകുളം ജില്ലയിൽ നെടുമ്പാശ്ശേരി -അത്താണി കരയിൽ ശ്രീരംഗം വീട്ടിൽ ശ്രീകാന്ത് (32) എന്നിവരെയാണ് എക്സൈസ് സംഘം അറസ്റ്റ് ചെയ്തത്. എക്സൈസ് ഷാഡോ സംഘത്തിന് ലഭിച്ച രഹസ്യവിവരത്തിന്റെയടിസ്ഥാനത്തിലാണ് പരിശോധന നടത്തിയത്.

ഒരേക്കറിലധികം വരുന്ന ടെന്റ്ക്യാമ്പിൽ നാലു മണിക്കൂറിലധികം പരിശോധന നടത്തിയപ്പോഴാണ് 0.150 ഗ്രാം എം ഡി എം എ,0.048 ഗ്രാം എൽ എസ് ഡി 3.390 ഗ്രാം,ഹാഷിഷ് ഓയിൽ, 10ഗ്രാം, കഞ്ചാവ് എന്നിവയാണ് ഇവരിൽ നിന്നും കണ്ടെടുത്തത്. ലഭിച്ചത്. തമിഴ്‌നാട്ടിൽ നിന്നെത്തിക്കുന്ന മയക്കുമരുന്നുകൾ ഓൺലൈനിലൂടെ ടെന്റ് ബുക്ക് ചെയ്തെത്തുന്ന യുവാക്കൾക്കാണ് വിൽപ്പന നടത്തിവന്നിരുന്നതായി ചോദ്യം ചെയ്യലിൽ ഇവർ അന്വേഷണ ഉദ്യോഗസ്ഥരോട് വെളിപ്പെടുത്തി.സംഭവത്തിൽ കൂടുതൽ പേർ ഉൾപ്പിട്ടിട്ടുണ്ടോ എന്നറിയാൻ വിശദമായ അന്വേഷണം നടത്തിവരികയാണെന്ന് എക്സൈസ് സർക്കിൾ ഇൻസ്പെക്ടർ എം കെ പ്രസാദ് അറിയിച്ചു.

റെയ്ഡിൽ പ്രിവന്റീവ് ഓഫീസർ റ്റി വി സതീഷ്, കെ വി പ്രദീപ്,സിവിൽ എക്സൈസ് ഓഫീസർമാരായ കെ എസ് മീരാൻ, ജോസ് പി, ഡ്രൈവർ ശരത് എസ് പി എന്നിവരും റെയ്ഡിൽ പങ്കെടുത്തു.പ്രതികളെയും തൊണ്ടി സാധനങ്ങളും ദേവികുളം കോടതിയിൽ ഹാജരാക്കും.

വട്ടവടയിൽ ടെന്റ് ക്യാമ്പിൽ നിന്നും ലഹരി വസ്തുക്കൾ

പ്രകാശ് ചന്ദ്രശേഖര്‍

    മറുനാടന്‍ മലയാളി ലേഖകന്‍.