ദോഹ: രാജ്യത്തെ വിദേശികൾക്കും ഹമദ് വിമാനത്താവളത്തിൽ സൗജന്യമായി ഇ-ഗേറ്റ് സംവിധാനം ലഭ്യമായിത്തുടങ്ങിയെന്ന് ആഭ്യന്തര മന്ത്രാലയം വ്യക്തമാക്കി. വിദേശികൾക്കും പതിനെട്ടു വയസിനു മുകളിലുള്ള അവരുടെ മക്കൾക്കും ഐഡി, പാസ്‌പോർട്ട് എന്നിവ ഉപയോഗിച്ച് മുൻകൂർ രജിസ്‌ട്രേഷൻ ഇല്ലാതെ തന്നെ ഇ-ഗേറ്റ് സംവിധാനം സൗജന്യമായി ഉപയോഗിക്കാം.

ഹമദ് അന്താരാഷ്ട്ര വിമാനത്താവളത്തിൽ നിന്നും പുറപ്പെടുന്ന സമയത്തും വിമാനത്താവളത്തിലേക്കത്തെുന്ന സമയത്തുമാണ് ഉപയോഗിക്കാൻ സാധിക്കുക. ഐഡി കാർഡോ പാസ്‌പോർട്ടോ ഉപയോഗിച്ച് സേവനം ഉപയോഗപ്പെടുത്താമെന്നും ഡിപ്പാർച്ചർ ലോഞ്ചിൽ 19 ഗേറ്റുകളും അറൈവൽ ലോഞ്ചിൽ 16 ഗേറ്റുകളുമാണ് ഇതിനായി സ്ഥാപിച്ചിരിക്കുന്നത്. പ്രധാനമന്ത്രി ശൈഖ് അബ്ദുല്ല ബിൻ നാസർ ബിൻ ഖലീഫ ആൽഥാനി മുൻകൈയെടുത്തു നടപ്പാക്കുന്ന സ്മാർട്ട് പാസഞ്ചർ പദ്ധതിയുടെ ഭാഗമായാണ് പുതിയ ഇ-ഗേറ്റ് സംവിധാനം.

കൗണ്ടറുകളിലുള്ള ഉദ്യോഗസ്ഥരെ സമീപിക്കാതെ തന്നെ പൂർണമായും സ്മാർട്ട് ടെക്‌നോളജി ഉപയോഗിച്ച് സ്വയം തങ്ങളുടെ പോക്ക് വരവ് നടപടിക്രമങ്ങൾ ഇതിലൂടെ ചെയ്യാം ഇതോടെ തങ്ങളുടെ വ്യക്തിഗത വിവരങ്ങൾ പരിശോധിക്കുന്നതിനും പാസ്‌പോർട്ടിൽ സീൽ ചെയ്യുന്നതിനുമായി ദീർഘനേരം കാത്ത് നിൽക്കുന്ന അവസ്ഥക്കും പരിഹാരമാകും. വ്യക്തികളുടെ സ്വകാര്യതയും സുരക്ഷയും പൂർണമായും സംരക്ഷിച്ചു കൊണ്ടായിരിക്കും സംവിധാനം പ്രവർത്തിക്കുക.