മസ്‌ക്കറ്റ്: ഒമാനിലും ഇ- വിസാ സംവിധാനം കൊണ്ടുവരുന്നു. ഇതിനുള്ള നടപടിക്രമങ്ങൾ അന്തിമ ഘട്ടത്തിലാണെന്ന് റോയൽ ഒമാൻ പൊലീസ് വ്യക്തമാക്കി. രാജ്യത്ത് ടൂറിസം മെച്ചപ്പെടുത്തുന്നതിന്റെ ഭാഗമായാണ് ഇ- വിസാ സംവിധാനം ഏർപ്പെടുത്തുന്നത്. കഴിഞ്ഞ 12 മാസമായി ഇതിനുള്ള നടപടിക്രമങ്ങൾ ചെയ്തു വരികയായിരുന്നു.

നിലവിൽ വിസാ ഓൺ അറൈവൽ സംവിധാനം മാത്രമാണ് ഉള്ളത്. പേയ്‌മെന്റ് സംവിധാനത്തിലും സുരക്ഷ ഏർപ്പെടുത്തികഴിഞ്ഞാൽ ഇ-വിസാ സംവിധാനം നടപ്പിൽ വരുത്തുമെന്നാണ് ആർഒപി വ്യക്തമാക്കിയിരിക്കുന്നത്. ഇ-വിസാ സംവിധാനത്തിൽ വിസാ ഫീസിന് മാറ്റമൊന്നുമില്ലെന്നും ഏതെങ്കിലും തരത്തിൽ മാറ്റമുണ്ടാകുകയാണെങ്കിൽ അത് പിന്നീട് പ്രസിദ്ധപ്പെടുത്തുമെന്നും റോയൽ ഒമാൻ പൊലീസ് വ്യക്തമാക്കുന്നു.

മാനുവൽ എൻട്രി സംവിധാനം മെല്ലെ നീക്കം ചെയ്യാനാണ് തീരുമാനം. ഓൺലൈനായി വിസയ്ക്ക് അപേക്ഷിക്കാനും ഐടിഎയുടെ ഇ-പേയ്‌മെന്റ് ഗേറ്റ് വേയിലൂടെയും മറ്റു ബാങ്ക് ചാനലുകളിലൂടെയും പണം അടയ്ക്കാൻ സാധിക്കുമെന്നും ആർഒപി വെളിപ്പെടുത്തുന്നു. ഓട്ടോമേറ്റഡ് വിസാ ആപ്ലിക്കേഷൻ സബ്മിഷൻ റിവ്യൂവും അപ്രൂവൽ പ്രോസസുമാണ് പുതിയ സംവിധാനത്തിൽ ഉണ്ടാവുക.