ശനിയാഴ്ച മാസപ്പിറവി ദൃശ്യമായില്ല; കേരളത്തിൽ ബലി പെരുന്നാൾ ജൂലായ് 21ന്

കോഴിക്കോട്: കേരളത്തിൽ ബലിപ്പെരുന്നാൾ 21ന്. ദുൽഖ അദ് 29 ആയ ശനിയാഴ്ച മാസപ്പിറവി ദൃശ്യമായില്ലെന്ന് വിവിധ ഖാസിമാർ അറിയിച്ചു. അതിനാൽ ഞായറാഴ്ച 30 പൂർത്തിയാക്കി ദുൽഹജ് 1 തിങ്കളാഴ്ചയും ഈദുൽ അസ്ഹ ദുൽഹജ് 10 ആയ 21നും ആയിരിക്കും.

കോഴിക്കോട് വലിയ ഖാസി നാസിർ അബ്ദുൽ ഹയ്യ് ശിഹാബ് തങ്ങൾ, കോഴിക്കോട് ഖാസി മുഹമ്മദ് കോയ തങ്ങൾ ജമലുല്ലൈലി, സംയുക്ത മഹല്ല് ഖാസി കാന്തപുരം എ.പി.അബൂബക്കർ മുസല്യാർ, പാളയം ഇമാം വി.പി.സുഹൈബ് മൗലവി, ദക്ഷിണ കേരള ജംഇയ്യത്തുൽ ഉലമ ജന.സെക്രട്ടറി തൊടിയൂർ മഹമ്മദ് കുഞ്ഞ് മൗലവി എന്നിവരാണ് ഇക്കാര്യം അറിയിച്ചത്. പാണക്കാട് ഹൈദരലി ശിഹാബ് തങ്ങൾ, സമസ്ത പ്രസിഡന്റ് ജിഫ്രി മുത്തുക്കോയ തങ്ങൾ എന്നിവരും പെരുന്നാൾ തീയതി സ്ഥിരീകരിച്ചു.