ഷിക്കാഗോ: ഷിക്കാഗോ രൂപതയിലെ ക്നാനായ റീജിയന്റെ ആഭിമുഖ്യത്തിൽ ആത്മീയ പഠനശിബിരം (എസ്രാ മീറ്റ്) ആരംഭിച്ചു. റീജിയണിലെ ഇടവകകളിൽ നിന്നും മിഷനുകളിൽ നിന്നുമുള്ള പ്രതിനിധികൾ പങ്കെടുത്ത ഈ ത്രിദിന നേതൃത്വ പഠന ക്യാമ്പ് സെപ്റ്റംബർ 21,22 ,23 തീയതികളിൽ ഷിക്കാഗോ സെന്റ് മേരീസ് ക്നാനായ കത്തോലിക്കാ പള്ളിയിൽ വച്ച് നടത്തപ്പെട്ടു.

റീജിയണിലെ വിവിധ ഇടവകകളിൽ നിന്നും ആത്മീയ ശുശ്രൂഷകൾക്ക് നേതൃത്വം നൽകുന്നവരും വചനപ്രഘോഷണം രംഗത്ത് പ്രവർത്തിക്കുന്നവരും പ്രാർത്ഥന ഗ്രൂപ്പുകളുടെ നേതൃത്വ നിരയിലുള്ളവരുമാണ് ഈ ട്രെയിനിങ് പ്രോഗ്രാമിൽ സംബന്ധിച്ചത്. ഷിക്കാഗോ രൂപതാധ്യക്ഷൻ അഭിവന്ദ്യ മാർ ജേക്കബ് അങ്ങാടിയത്ത് ക്യാമ്പ് ഉദ്ഘാടനം ചെയ്തു.

ക്രിസ്റ്റീൻ ഡയറക്ടർ സന്തോഷ് റ്റി, ക്നാനായ റീജിയൻ ഡയറക്ടർ റവ. ഫാദർ തോമസ് മുളവനാൽ, ഫാ. ബിൻസ് ചേത്തലിൽ, ജെൻസൺ കൊല്ലാപറമ്പിൽ, ബിബി തെക്കനാട്ട്, റ്റോബി മണിമലേത്ത്, സ്റ്റീഫൻ പുതുപ്പള്ളി മ്യാലിൽ തുടങ്ങിയവരാണ് ക്ലാസുകൾക്ക് നേതൃത്വം നല്കിയത്. റീജിയണിലെ വിവിധ മിനിസ്ട്രികളിൽ നേതൃത്വം നൽകുന്നവരുടെ ആത്മീയ കൃപകൾ ഇടവകകളുടെ അജപാലന പ്രവർത്തനങ്ങൾക്കും സഹായകമാകുംവിധം പ്രയോജനപ്പെടുത്തുവാനും ആഗോള സുവിശേഷ വത്കരണത്തിൽ പങ്കാളികളാകുവാനുള്ള പരിശീലനമാണിവിടെ നടന്നത്. കുട്ടികൾ, യുവജനങ്ങൾ, മാതാപിതാക്കൾ തുടങ്ങി മുതിർന്നവർവരെയുള്ളവർക്കു വേണ്ടിയുള്ള പ്രത്യേക ശുശ്രൂഷകൾക്ക് നേതൃത്വം നൽകുവാൻ സഹായകമാവും വിധമുള്ള ക്ലാസുകളും വിഭാവന ചെയ്തിരുന്നു. ബൈബിൾ പഠനം, പ്രാർത്ഥനാ പരിശീലനം, വചന വ്യാഖ്യാന പരിശീലനം, ശിൽപശാലകൾ, സെമിനാറുകൾ എന്നിവ പഠനശിബിരത്തിന്റെ പ്രത്യേകതകളാണ്.

ക്നാനായ റീജിയന്റെ ആഭിമുഖ്യത്തിൽ ഫോറോനാ തലത്തിൽ നടന്നുവരുന്ന സെനക്കിൽ മീറ്റുകൾക്ക് പുറമേയാണ് റീജിയണൽ തലത്തിലുള്ള എസ്രാ മീറ്റ് നടത്തിയത്. സെപ്റ്റംബർ 23 ഞായറാഴ്ച വൈകിട്ട് സമാപിച്ച ഈ ത്രിദിന സഗംമത്തിൽ നിരവധിപേർ പങ്കെടുത്തു. സ്റ്റീഫൻ ചൊള്ളമ്പേൽ (പി.ആർ.ഒ) അറിയിച്ചതാണിത്.