ഫീനിക്‌സ്: കേരളപ്പെരുമ പ്രകടമാക്കുന്ന തനതുകലകളുടെ വിരുന്നൊരുക്കുന്നതിൽ ഫീനിക്‌സിലെ മലയാളികൾ എന്നും മുമ്പന്തിയിലാണ്. ഇത്തവണ ഹോളി ഫാമിലി സീറോ മലബാർ ദേവാലയം സംഘടിപ്പിച്ച ഫെയ്ത്ത് ഫെസ്റ്റ് കലോത്സവമാണ് പരമ്പരാഗത ക്രൈസ്തവ കലകളുടെ അവതരണത്തിനു വേദിയായത്.

മാർഗംകളിയും പരിചമുട്ടുകളിയും പഴയ തലമുറയിൽ ഗൃഹാതുരത്വമുണർത്തിയപ്പോൾ, ന്യൂജനറേഷനത് ആവേശമായി മാറി. ക്രൈസ്തവ പ്രമേയങ്ങൾ ഇതിവൃത്തമായി സ്വീകരിച്ച് ഭരതനാട്യം, കുച്ചിപ്പുടി തുടങ്ങിയ നൃത്തങ്ങളും വേദി കീഴടക്കി. വിവിധ ഭാഷകളിലെ ക്ലാസിക്, സെമി ക്ലാസിക്, പാശ്ചാത്യ നൃത്തകലകളെ ഒരുമിപ്പിച്ച് അമ്പതിലധികം കലാകാരന്മാരും കലാകാരികളും ചേർന്ന് അവതരിപ്പിച്ച ഫ്യൂഷൻ ഡാൻസ് കലാ-സാംസ്‌കാരികാനുരൂപണത്തിന് ഉത്തമ മാതൃകയായി. രംഗത്തെത്തിയ ലഘു നാടകങ്ങൾ, മൂകാഭിനയം പോലുള്ള കലാപരിപാടികളും ഫീനിക്‌സ് മലയാളികളുടെ പ്രതിഭാ തിളക്കം പ്രകാശിപ്പിക്കുന്നതായി.

ഹോളി ഫാമിലി ഇടവക വികാരി ഫാ. ജോർജ് എട്ടുപറയിൽ ഉദ്ഘാടനം നിർവഹിച്ചു. സൺഡേ സ്‌കൂൾ വിദ്യാർത്ഥികളേയും യുവജനങ്ങളേയുമടക്കം ഇരുപതിലധികം കലാകാരന്മാരേയും കലാകാരികളേയും രംഗത്തെത്തിക്കാൻ കഴിഞ്ഞു എന്നാണ് ഫെയ്ത്ത് ഫെസ്റ്റ് 2016-ന്റെ വിജയമെന്ന് പ്രോഗ്രാം കോഓർഡിനേറ്റർ ഷാജു ഫ്രാൻസീസ് പറഞ്ഞു. സൺഡേ സ്‌കൂൾ പ്രിൻസിപ്പൽ സാജൻ മാത്യു, ആന്റോ യോഹന്നാൻ, ഡോ. ജൂഡി റോയി, സുഷാ സെബി എന്നിവരായിരുന്നു പരിപാടികളുടെ മുഖ്യ സംഘാടകരായിരുന്നു.