ഡാളസ്: സൗത്ത് വെസ്റ്റ് അമേരിക്കൻ ഭദ്രാസന ഫാമിലി കോൺഫറൻസിന് ഡാളസ് ഇന്റർ കോണ്ടിനെന്റൽ ഹോട്ടലിൽ എട്ടിന് തിരശീല ഉയരും.

കോൺഫറൻസിനു തുടക്കംകുറിച്ചുള്ള ഘോഷയാത്ര ജൂലൈ എട്ടിനു ബുധനാഴ്ച വൈകിട്ട് 5.30-ന് ഹോട്ടൽ അങ്കണത്തിൽ ആരംഭിക്കും. ഫാമിലി കോൺഫറൻസിന്റെ ബാനറിനു പിന്നിൽ കോൺഫറൻസ് ഡയറക്ടർ റവ. ഫാ. മാത്യു അലക്‌സാണ്ടർ ബൈബിളും, ട്രഷറർ ലജീത് മാത്യു കുരിശും, സഭാ മാനേജിങ് കമ്മിറ്റി അംഗങ്ങളും, ഭദ്രാസന കൗൺസിൽ അംഗങ്ങളും കാതോലിക്കേറ്റ് പതാകയും, വിവിധ ആദ്ധ്യാത്മിക നേതാക്കൾ അമേരിക്കൻ പതാകയും ടെക്‌സസ് പതാകയും ഇന്ത്യൻ പതാകയും കനേഡിയൻ പതാകയും കൈയിലേന്തുന്നതാണ്.

അതിനുശേഷം എം.ജി.ഒ.സി.എസ്.എം അംഗങ്ങൾ മുൻ കാതോലിക്കാ ബാവാമാരുടെ ചിത്രം വഹിക്കുന്നതാണ്. സൺഡേ സ്‌കൂൾ കുട്ടികൾ ചെറിയ കാതോലിക്കേറ്റ് പതാകയും പടിക്കും. അതിനു പിന്നിലായി പരമ്പരാഗത ഇന്ത്യൻ നിർമ്മിത ഒരേ നിറത്തിലുള്ള സാരി ധരിച്ച സ്ത്രീകൾ അണിനിരക്കും. അവർക്ക് പുറകിലായി പുരുഷന്മാർ, പിന്നാലെ വൈദീക വിദ്യാർത്ഥികൾ, ശെമ്മാശന്മാർ, വൈദീകർ എന്നീ ക്രമത്തിൽ നീങ്ങും.

ഭദ്രാസന സെക്രട്ടറി റവ.ഫാ. ജോയി പൈങ്ങോലിൽ പരിശുദ്ധ ബാവാ തിരുമേനിയുടെ അംശവടി വഹിക്കുന്നതാണ്. ഏറ്റവും പിറകിലായി വിശിഷ്ടാതിഥികളോടൊപ്പം പരിശുദ്ധ ബാവാ തിരുമേനിയും, ഭദ്രാസനാധ്യക്ഷൻ അലക്‌സിയോസ് മാർ യൗസേബിയോസ് മെത്രാപ്പൊലീത്തയും എഴുന്നള്ളുന്നതാണ്.

ഘോഷയാത്ര സമ്മേളന വേദിയിൽ എത്തിയതിനുശേഷം സന്ധ്യാ നമസ്‌കാരവും, ഉദ്ഘാടന സമ്മേളനവും, ഡയറക്ടറി പ്രകാശനവും നടക്കും. വൈകിട്ട് ഡിന്നറിനുശേഷം മാജിക് ഷോ ഉണ്ടായിരിക്കുന്നതാണ്.  രജിസ്‌ട്രേഷൻ കൗണ്ടർ  എട്ടാം തീയതി 2 മണി മുതൽ പ്രവർത്തനം ആരംഭിക്കും. 4 കൗണ്ടർ ഉണ്ടായിരിക്കുന്നതാണ്. ട്രാൻസ്‌പോർട്ടേഷനും പ്രത്യേക സൗകര്യം ഉണ്ടായിരിക്കുന്നതാണ്.

കോൺഫറൻസിനോടനുബന്ധിച്ച് ജീസസ് ക്രൈസ്റ്റ്, പരിശുദ്ധ മാതാവ്, പരുമല തിരുമേനി എന്നിവരുടെ ഐകോൺ വിൽപ്പന കൗണ്ടറിൽ ഉണ്ടായിരിക്കുന്നതാണ്. മൂന്നിനുംകൂടി 250 ഡോളർ ആണ്.

ഭദ്രാസന കൗൺസിൽ മെമ്പറും, കോൺഫറൻസ് സെക്രട്ടറിയുമായ എൽസൺ സാമുവേൽ അറിയിച്ചതാണിത്.