മലപ്പുറം: ബിരുദ ബിരുദാനന്തര രംഗത്ത് ഏറ്റവും കൂടുതൽ വിദ്യാർത്ഥികൾ സീറ്റ്ക്ഷാമം അനുഭവിക്കുന്ന ജില്ലയാണ് മലപ്പുറം. ജില്ല അനുഭവിക്കുന്ന ഉന്നത വിദ്യാഭ്യാസ പ്രതിസന്ധി പരിഹരിക്കാൻ ഫ്രറ്റേണിറ്റിയടക്കമുള്ള വിദ്യാർത്ഥി സംഘടനകൾ നിരന്തര സമരങ്ങൾ നടത്തിയിരുന്നു. സമരങ്ങളുടെ സമർദ്ദഫലമായി താൽക്കാലികാശ്വാസമെന്ന നിലക്ക് മൂന്ന് കോളേജുകളിൽ പുതിയ കോഴ്‌സുകൾ അനുവദിച്ചായി ഉന്നത വിദ്യാഭ്യാസ മന്ത്രി പ്രഖ്യാപിച്ചിരുന്നു.

സെപ്റ്റംബർ ഒന്നാം തീയതി മലപ്പുറം പ്രസ് ക്ലബിലെ വാർത്താ സമ്മേളനത്തിലാണ് മന്ത്രി കെ.ടി ജലീൽ ഈ പ്രഖ്യാപനം നടത്തിയത്. മലപ്പുറം ഗവൺമെന്റ് കോളേജിന് എം.എസ്സി. ഫിസിക്‌സ്, എം.എ ഹിസ്റ്ററി കോഴ്‌സുകളും, പെരിന്തൽമണ്ണ പി.ടി.എം കോളേജിന് എം.എസ്.സി ഫിസിക്‌സ്, ബി.എസ്.സി കെമിസ്ട്രിയും, കൊണ്ടോട്ടി ഗവൺമെന്റ് കോളേജിന് എം.എസ്.സി മാത് സ്, എം.എ ഇംഗ്ലീഷ് കോഴ്‌സുകളാണ് മന്ത്രി പ്രഖ്യാപിച്ചത്. മാസം ഒന്ന് കഴിഞ്ഞിട്ടും ഈ പ്രഖ്യാപനം സർക്കാർ ഉത്തരവായി പുറത്തിറങ്ങിയിട്ടില്ല.

ഇനിയും വൈകിയാൽ ഈ അധ്യയന വർഷം കോഴ്‌സുകൾ നടപ്പിലാക്കാനാവുകയില്ല. അതിനാൽ എത്രയും പെട്ടെന്ന് മന്ത്രിയുടെ വാഗ്ദാനം നടപ്പിലാക്കാനുള്ള നടപടി സർക്കാർ കൈക്കൊള്ളണം. ഈ അധ്യയന വർഷം മന്ത്രി അന്ന് സൂചിപ്പിച്ച പോലെ ഡിഗ്രി കോഴ്‌സുകൾ നടപ്പിലാക്കുന്നില്ലെങ്കിൽ കാമ്പസ് ഇലക്ഷന് രണ്ട് ദിവസം മുമ്പ് മലപ്പുറത്ത് വെച്ചുള്ള മന്ത്രിയുടെ പ്രഖ്യാപനം വെറും രാഷ്ട്രീയ മുതലെടുപ്പായേ കാണാൻ പറ്റൂ. അങ്ങനെയാണെങ്കിൽ ശക്തമായ പ്രക്ഷോഭങ്ങളുമായി മലപ്പുറം ജില്ലയിലെ മുഴുവൻ വിദ്യാർത്ഥികളെയും അണിനിരത്തി സമരരംഗത്തിറങ്ങുമെന്ന്ഫ്രറ്റേണിറ്റി മലപ്പുറം ജില്ല സെക്രട്ടറിയേറ്റ് അറിയിച്ചു.

ജില്ല പ്രസിഡന്റ് കെ.കെ അഷ്‌റഫ് അധ്യക്ഷത വഹിച്ചു. ഹബീബ റസാഖ്, ബഷീർ തൃപ്പനച്ചി, സാബിഖ് വെട്ടം, അഫ്‌സൽ മങ്കട, ഷാഫി കൂട്ടിലങ്ങാടി, റസീൻ ബാബു, ബാസിത് താനൂർ, റബീ ഹുസൈൻ തങ്ങൾ, അജ്മൽ തോട്ടോളി എന്നിവർ സംസാരിച്ചു.